«Ընդդեմ իրավական կամայականությունների» ՀԿ-ն Մամիկոն Խոջոյանի հարցով կդիմի ՄԻԵԴ

«Ընդդեմ իրավական կամայականությունների» կազմակերպությունը ստացել է Մամիկոն Խոջոյանի երկու դուստրերի համաձայնությունը հայ գերու սպանության առնչությամբ Մարդու իրավունքների եվրոպական դատարանում դատական գործ հարուցելու վերաբերյալ: Հունիսի 27-ին լրագրողների հետ հանդիպման ժամանակ Լարիսա Ալավերդյանն ասաց, որ իրենց կազմակերպությունը մի քանի անգամ հանդիպել է Մամիկոն Խոջոյանին, գրի առել նրա խոսքերը, ունի նաև բժշկական եզրակացություն, համաձայն որի, Խոջոյանին ոչ միայն ենթարկել են խոշտանգումների, այլև ներարկել նավթամթերք:

Լարիսա Ալավերդյանն ասաց, որ Հայաստանում գործ է հարուցվել Խոջոյանի մահվան առնչությամբ, այժմ կազմակերպությունը պաշտոնական գրություն է ուղարկել Ադրբեջան, որպեսզի այնտեղ էլ քրեական գործ հարուցվի հայ գերու մահվան կապակցությամբ:

«Մենք, իհարկե, վստահ ենք, որ Ադրբեջանում գործ չեն հարուցի և չեն ուսումնասիրի փաստերը, քանի որ հայ գերուն խոշտանգելը նրանց պետական քաղաքականության մի մասն է, ինչպես դա եղավ Մանվել Սարիբեկյանի պարագայում: Սակայն դա պաշտոնական գործընթաց է, և եթե Ադրբեջանը մերժի կամ չպատասխանի մեր գրությանը, կսպասենք ամենաքիչը մեկ ամիս և հայց կներկայացնենք Մարդու իրավունքների եվրոպական դատարան»,- ասաց Ալավերդյանը' հավելելով, որ իրենց կազմակերպությունը հիմնական աշխատանքը կատարել է, և մնացել է կարգավորել մի քանի տեխնիկական հարցեր: Ալավերդյանը հավելում է, որ մտադիր են նաև ՄԻԵԴ դիմել ոչ միայն Մամիկոն Խոջոյանի, այլև մի շարք հայ գերիների' Ադրբեջանում խոշտանգումների հարցով: Դա արդեն կլինի հավաքական հայց, որի հարցում, ըստ Ալավերդյանի, անհրաժեշտ է լուրջ աշխատանք կատարել և մանրամասն ուսումնասիրել յուրաքանչյուր դեպքը:

Անդրադառնալով հայ գերիներին և անհայտ կորածներին' Ալավերդյանն ասաց, որ իրենց կազմակերպության տվյալներով, Արցախյան պատերազմի ժամանակ անհայտ կորածների թիվը 955-ն է, նրանցից 547-ը խաղաղ բնակիչներ, ովքեր չեն ցանկացել կամ չեն կարողացել լքել իրենց բնակավայրերը: Սա, ըստ Ալավերդյանի, ամենաամբողջական ցուցակն է, քանի որ ներառված են թե պաշտոնական, թե միջազգային ցուցակներն ու նաև քաղաքացիների ներկայացրած ցանկերը:

Ալավերդյանի փոխանցմամբ, Հեյդար Ալիևի նախագահության ընթացքում կային որոշակի հնարավորություններ հասարակական կազմակերպությունների համագործակցության և գերիների փոխանակման առնչությամբ, սակայն Իլհամ Ալիևի նախագահությունն ստանձնելուց հետո որևէ համագործակցություն դադարեց, ինչի հետևանքով անհնար են դարձել գերիների և անհետ կորածների հարցերով որևէ համագործակցությունն ու փոխանակումները: