Ֆուտբոլի աշխարհի առաջնության բացման արարողությունները կանցկացվեն երեք տարբեր երկրներում

ՖԻՖԱ-ն հայտարարել է, որ 2026 թվականի ֆուտբոլի աշխարհի առաջնության ընթացքում բացման առանձին արարողություններ կանցկացվեն մրցաշարը հյուրընկալող երեք երկրներում՝ Մեքսիկայում, Կանադայում և ԱՄՆ-ում։ Այս մասին հայտնում է Reuters-ը։

Պատմության ամենախոշոր աշխարհի առաջնությունը կմեկնարկի հունիսի 11-ին Մեխիկոյում։ ՖԻՖԱ-ի տվյալներով՝ բացման միջոցառմանը ելույթ կունենան Grammy մրցանակակիր մեքսիկական Mana խումբը, ինչպես նաև Ալեխանդրո Ֆերնանդեսն ու Բելինդան։ Միջոցառումը նվիրված կլինի մեքսիկական մշակույթին և կներառի ինչպես բնիկ ժողովուրդների, այնպես էլ ժամանակակից ֆոլկլորային կատարումներ։

Կանադայում բացման արարողությունը տեղի կունենա հունիսի 12-ին Տորոնտոյում՝ Կանադա — Բոսնիա և Հերցեգովինա խմբային խաղից առաջ։ Բեմում հանդես կգան Ալանիս Մորիսեթը, Մայքլ Բուբլեն, Ալեսիա Կարան, Ուիլյամ Փրինսը և DJ Sanjoy-ը։ Նույն օրը ԱՄՆ-ում՝ Լոս Անջելեսում, ԱՄՆ — Պարագվայ խաղից առաջ գլխավոր ելույթով հանդես կգա Քեթի Փերին։ Ծրագրում ընդգրկված են նաև Future-ը, Anitta-ն, LISA-ն, Rema-ն և Tyla-ն։

ՖԻՖԱ-ն նշել է, որ այս տարվա աշխարհի առաջնությունը երկրորդ դեպքն է պատմության մեջ, երբ մրցաշարը միաժամանակ անցկացվում է մի քանի երկրներում։ Առաջին նման առաջնությունը կայացել էր 2002 թվականին՝ Ճապոնիայի և Հարավային Կորեայի համատեղ կազմակերպմամբ։