Գագիկ Հարությունյանը ցանկանում է՝ իր երեխաներն ապրեն մարդակենտրոն Սահմանադրություն ունեցող երկրում

Սահմանադրական բարեփոխումների նախնական հայեցակարգի շուրջ հանրային քննարկումների մարզային փուլը շարունակվում է. հերթականն Արմավիրի մարզկենտրոն Արմավիր քաղաքում է: Քաղաքի մարզպետարանի դահլիճում են հավաքվել մարզի հասարակական, քաղաքական կառույցների ներկայացուցիչները, հետաքրքրված քաղաքացիներ:

Սահմանադրական դատարանի նախագահ Գագիկ Հարությունյանը պատմական ակնարկ կատարեց ու ներկայացրեց Հայաստանի պատմության մեջ սահմանադրականության հիմքերը' գալով մինչ մեր օրերը: «Զարգացումները բոլոր նորանկախ պետություններում գնացին պետական հիմքերի ստեղծման ճանապարհով. ստեղծել պետական իշխանության մարմիններ, հաստատել դրանց գերակայությունը, բայց ինչպես այս խնդիրը լուծել մարդու իրավունքների համարժեք պաշտպանվածության հետ միաժամանակ: Առաջին հերթին' պետք են սահմանադրական լուծումներ' ուղղված մարդու իրավունքների ճանաչմանը, ապահովմանն ու պաշտպանությանը»,-«Արմենպրես»-ի հաղորդմամբ' ասաց Գագիկ Հարությունյանը:

Նրա խոսքով' սահմանադրությունների միջազգային զարգացումները երկու հիմնական վեկտոր ունեն' իշխանակենտրոն սահմանադրություն և մարդակենտրոն սահմանդրություն, որի կենտրոնում մարդն է, ու ամեն ինչ համապատասխանում է նրա բնական իրավունքների ու ազատությունների գերակայությանը:

«Անկախացումից հետո Սահմանադրության ստեղծումը գնաց իշխանակենտրոն սահմանադրության ստեղծման ճանապարհով, որը մեծ դեր ունեցավ մեր պետականության կայացման հարցում, բայց բաց մնաց մարդակենտրոն սկզբունքը: Այժմ մենք հիմա պետք է ձգտենք գնալ մարդակենտրոն սահմանադրություն ստեղծելու ուղղությամբ»,- նշեց ՍԴ նախագահը' հավելելով, որ սահմանադրության բարեփոխման առաջին քայլերն արվեցին ՀՀ Սահմանադրությունն ընդունելուց հետո' 1990-անների վերջին:

Գագիկ Հարությունյանի համոզմամբ' Հայաստանում չկա մի քաղաքացի, ով չի ցանկանում, որ իր իրավունքները պաշտպանված լինեն, որ իշխանությունը սահմանափակված լինի նորմերով, որ մենք ունենանք հստակ գործող արդարադատական համակարգ, որ իշխանությունն ունենա հանրային պատասխանատվության բարձր մակարդակ: «Որքան այս խնդիրները հստակեցված չեն, այնքան իշխանությունը չի կարող ավելի լավը լինել: Բարեբախտաբար, քաղաքացիական հասարակությունը կայանում է, մեր մամուլն ակտիվ է, վերին էշելոններում գիտակցում են հարցը, բայց խնդիրը միջին օղակներում է: Համակարգը պետք է այնպիսին լինի, որ հայեցողության սահմանները լինեն սահմանափակ, իշխանությունը սահմանափակված լինի իրավունքով, իսկ հայեցողությունը լինի վերահսկելի»,- նշեց Գագիկ Հարությունյանը' հավելելով, որ համաձայնել է ՀՀ Նախագահին կից սահմանադրական բարեփոխումների մասնագիտական հանձնաժողովի նախագահությունը ստանձնել' հաշվի առնելով նշյալ խնդիրները:

«Ես ցանկանում եմ, որ իմ երեխաներն ապրեն այնպիսի երկրում, որտեղ չինովնիկները չեն որոշոմ նրանց ճակատագիրը, որտեղ օրենքներն են գործում, որտեղ կա սահմադրություն, որը սահման է դնում, տալիս է նաև ազատության սահմանները»,- ասաց Գագիկ Հարությունյանը' ավելացնելով, որ այդպիսի Սահմադրություն չունենալու դեպքում պետք է ապավինել իշխողների բարյացակամությանը, իսկ դա կարող է պայմանավորվել տարբեր գործոններով:

Սահմանադրական բարեփոխումների հայեցակարգի հանրային քննարկումների մարզային փուլի շրջանակներում հանդիպումներ են անցկացվել Աշտարակում, Արտաշատում: ՀՀ Նախագահին կից սահմանադրական բարեփոխումների մասնագիտական հանձնաժողովի անդամները քննակում են ունեցել նաև հոգևորականների հետ Մայր Աթոռում և սպասում են նրանց առաջարկություններին, որոնք հաշվի կառնվեն վերջնական հայեցակարգի մշակման ժամանակ: