Ադրբեջանի «ռեկորդակիր» խորհրդարանը. 37 օրենք` մեկ նիստում

Ադրբեջանում բռնապետական կառավարման պատճառով բոլոր, այդ թվում նաև կրթության, առողջապահության, դատական բնագավառներում հնարավոր է «հրաշքների» թվին դասվող գործընթավների վկա լինել: Սակայն, «ռեկորդային հրաշքը» պատկանում է երկրի խորհրդարանի` Միլի Մեջլիսի ակտիվին: Ոչ թե նրա համար, որ քվերակության ժամանակ մի պատգամավոր կարող է քվեարկել նաև ուրիշների փոխարեն: Բնական է, որ այդ փաստով նույնպես Միլի Մեջլիսը կարող է հայտնվել Գիննեսի «Ռեկորդների» գրքում:

Ինչպես հաղորդում է «Արմենպրես»-ը, այս մասին գրում է «Ազադլիգ» թերթը` նշելով, որ «ռեկորդների» հասնող իրադարձությունը նիստերի ժամանակ Ադրբեջանի Միլի Մեջլիսի օրակարգ մտցրած հարցերի մեծ թիվն է:

«Պատկերացրեք, որ «կայծակնային արագությամբ» գործող ադրբեջանցի պատգամավորները մի քանի ժամվա ընթացքում կարող են քննարկել 20-30 հարց և որոշում ընդունել:

Օրինակ, հոկտեմբերի 17-ին անցկացված նիստում օրակարգում 30 հարց է եղել դրված, մայիսի 30-ի նիստում` 18 հարց, ապրիլի 4-ի նիստում` 17 հարց և որոշումներն ընդունվել են բոլոր հարցերի գծով: Սեպտեմբերի 30-ին Միլի Մեջլիսն անցել է «ուժեղացված ռեժիմի» և 37 օրենքի նախագիծ ընդունել: Անգամ պատգամավոր Զահիդ Օրուջն էր բողոքել այդ «ճարպկության» դեմ և տեղի ունեցածն անվանել «աշխարհի ռեկորդ», -գրում է թերթը:

«Ազադլիգ»-ը հիշեցնում է, որ Միլի Մեջլիսի հերթական նիստն անցկացվելու է հոկտեմբերի 28-ին, որի օրակարգում արդեն 21 հարց է ներառվել:

«Հարկադրված ենք խոստովանել, որ փաստորեն, մեր կառավարությունը «նմանը չունի»: Նորմալ դեպքում 3-4 ժամվա ընթացքում հնարավոր չէ 25-30 հարց քննարկել: Դրա համար պետք է աստվածային ուժի տեր լինել: Այսինքն, մեր պատգամավորները պետք է «ընտրյալներ»-ից լինեն: Բայց մեր պատգամավորներին ոչ միայն Ալլահը, անգամ նրա ծառաները չեն ընտրել: Նման դեպքում, 125 պատգամավորներն այդ ո՞ր ուժերի ազդեցության տակ են «3-րդ տիեզերական արագություն» ձեռք բերում:

Երևում է՝ նախագահի աշխատակազմի կողմից եկող «արտառոց սարսափն» է ստիպում մեր պատգամավորներին աշխատել արտակարգ պայմաններում:

Հենց այդ 3-4 ժամանոց քննարկումների արդյունքն է, որ մեր պետությունը հարստանում, բնակչությունը՝ սնանկանում է: Երկրի ճակատագրական հարցերի 1-2 ժամվա ընթացքում ընդունելու արդյունքն է, որ ժողովրդի ճակատագիրն անորոշ է: Գուցե պետք չէ զարմանալ դրա վրա: Եթե ծխախոտ չծխողը մեղադրվում է թմրամոլության մեջ, մտավորականին «հայրենիքի դավաճանի» են վերածում, կարած գրպանից հակատանկային ական են հանում, Միլի Մեջլիսի մեկ նիստում էլ կարելի է 100 օրենքի նախագիծ ընդունել: Երևում է՝ արագ զարգացումից խոսելիս, մեր կառավարությունը այդ պահերն է նկատի ունեցել» , -գրում է թերթը և հարցնում՝ այդ ինչպե՞ս է, որ խորհրդարանը տասնյակ տարիներ շարունակ չի կարողանում քննարկել և ավարտին հասցնել կրթության վարկավորման, մրցակցության կոդեքսի, բժշկական ապահովագրության, դիֆամացիայի, եկամուտի հայտարարագրման նման օրինագծերը, իսկ կառավարությանը դուր եկած օրենքներն ընդունում է կայծակնային արագությամբ: