Ռումինիայի արքայադուստրն ԱՄՆ-ում դատապարտվել է աքլորամարտերի կազմակերպման համար

Ռումինիայի վտարանդի թագավորի դուստրը՝ Իրինան, և նրա ամուսինը դատապարտվել են պայմանական ազատազրկման և խոշոր տուգանքի՝ ԱՄՆ-ի Օրեգոնի նահանգի իրենց ռանչոյում արգելված աքլորամարտերի կազմակերպման համար, տեղեկացնում է «Արմենպրես»-ը: Նահանգի իշխանությունները կնոջը ձերբակալել են անցյալ տարվա օգոստո սին: Հետաքննության տվյալներով՝ 61-ամյա Իրինա Ուոքերը և նրա ամուսինը՝ Ջոն Ուեսլի Ուոքերը, վերջին մեկուկես տարում իրենց ռանչոյում կազմակերպել են առնվազն տասն աքլորամարտ:

Ուոքերների ամուսնական զույգն արգելված շոուի հանդիսականներից հավաքել է 10-ական դոլար, մինչդեռ իրենց աքաղաղին ցուցադրել ցանկացող մասնակիցներն ամուսիններին վճարել են մինչև 1000 դոլար, հաղորդել է Reuters գործակալությունը:

Ամբաստանյալները գործարքի մեջ են մտել հետաքննության հետ, ինչի շնորհիվ հանվել են նրանց դեմ հարուցված լրացուցիչ մեղադրանքները: Դատարանն ամուսիններին դատապարտել է երեք տարվա պայմանական ազատազրկման և 200 հազար դոլարի չափով տուգանքի:

Իրինա Ուոքերը Ռումինիայի Միխայ Առաջին թագավորի և նրա տիկնոջ՝ արքայադուստր Աննա Բուրբոն Պարմացու դուստրն է, հաղորդել է ՌԻԱ Նովոստին: