Դիլմա Ռուսեֆը վերընտրվել է Բրազիլիայի նախագահ

Բրազիլիայում կայացած նախագահական ընտրությունների երկրորդ փուլում հաղթել է պետության գործող ղեկավար Դիլմա Ռուսեֆը: 99 տոկոս քվեաթերթիկների հաշվումից հետո նա հավաքել է ձայների 51,54 տոկոսը: Այդ մասին, ինչպես տեղեկացնում է «Արմենպրես»-ը, վկայում են Բրազիլիայի Գերագույն ընտրական տրիբունալի տվյալները: Սոցիալ-դեմոկրատներին ներկայացնող նրա մրցակցի՝ նախկին սենատոր Աեսիու Նևիսի օգտին քվեարկել է ընտրողների 48,46 տոկոսը:

Ընտրությունների առաջին փուլը տեղի է ունեցել հոկտեմբերի 5-ին: Այն ժամանակ Ռուսեֆը, որը ներկայացնում է Աշխատավորների կուսակցությունը, հավաքել էր ձայների 41,59 տոկոսը, Նևիսը՝ 33,55 տոկոսը:

Բրազիլիայի սահմանադրության համաձայն՝ Ռուսեֆը նախագահի պաշտոնում կմնա ևս չորս տարի: Ինչպես նշում է Reuters-ը, չնայած տնտեսական խնդիրներին, որոնց բախվել է Բրազիլիան, պետության ղեկավարին ու նրա կողմնակիցներին հաջողվեց հաջող ընտրարշավ անցկացնել՝ համոզելով ընտրողներին, հատկապես չունևորներին, որ Նևիսի հաղթելու դեպքում երկիրը կվերադառնա սոցիալական անհավասարության քաղաքականությանը:

Ինչպես նշում է ՌԻԱ «Նովոստին», Աեսիու Նևիսը Դիլմա Ռուսեֆին շնորհավորել է հաղթանակի առթիվ և կոչ է արել նրան ամեն ինչ անել երկիրը միավորելու համար:

«Կարծում եմ, որ ամենագլխավոր գերակայությունը պետք է դառնա ամբողջ Բրազիլիայի միավորումը»,- ասել է Նևիսը՝ ելույթ ունենալով իր կողմնակիցների առջև: Հայտնելով, որ ինքն արդեն Ռուսեֆին շնորհավորել է հաղթանակի առթիվ, Նևիսն ասել է, թե զգում է, որ «կատարել է իր առաջադրանքը»: «Ես լավ մարտ անցկացրի և հավատում էի: Շատ շնորհակալ եմ»,- Նևիսի խոսքը մեջբերել է Infobae հրատարակությունը: