Յաիր Աուրոն. Իսրայելը չպետք է զենք վաճառի Ադրբեջանին

Իսրայելական Haaretz պարբերականը հրապարակել է իսրայելցի պատմաբան, ցեղասպանագետ Յաիր Աուրոնի հոդվածը, ուր ցեղասպանագետն Իսրայելին կոչ է անում անմիջապես դադարեցնել զենքի վաճառքն Ադրբեջանին: «Միջազգային պարտավորություններից զատ' Իսրայելը բարոյական պարտավորություն ունի այս հարցում: Շատ լուրջ հետևանքներ կլինեն, եթե պարզվի, որ Ադրբեջանի անվտանգության ուժերը մարդկության դեմ հանցագործություններ են գործել իսրաելական զենքով»,- «Արմենպրես»-ի հաղորդմամբ' նշում է Աուրոնը և հավելում. «Ցեղասպանություն իրականացրած կառավարություններին զենքի վաճառքը հավասարազոր է Երկրորդ համաշխարհայինի ժամանակ ֆաշիստական Գերմանիային զենք վաճառելուն: Իսրայելը պետք է ձեռնպահ մնա նման գործողություններից նաև այն պատճառով, որ մենք Հոլոքոստ վերապրած ժողովուրդ ենք»:

Օգոստոսին' հայ-ադրբեջանական սահմանում և շփման գծում լարվածության սրացումից հետո, Յաիր Աուրոնը և փաստաբան Էիթեյ Մաքը հրատապ նամակ են հղել Իսրայելի ՊՆ զենքի վաճառքի համակարգման բաժնի ղեկավար Դուբի Լավիին' կոչ անելով դադարեցնել իսրայելական զենքի վաճառքն Ադրբեջանին: Սակայն նախարարությունից ստացված պատասխանն այնքան էլ հուսադրող չէ:

Լրատվամիջոցների հրապարակումների համաձայն' Իսրայելն Ադրբեջանին զենք մատակարարող առաջատար երկրներից է: Ռուսաստանի նման այդ երկիրն ակնհայտորեն անտեսում է զենքի էմբարգոն:

1992 թվականի պատերազմի բռնկումից հետո ԵԱՀԿ-ն կոչ արեց իր անդամ երկրներին արգելել զենքի արտահանումը Լեռնային Ղարաբաղի հակամարտության մեջ ներգրավված կողմերին: Բրիտանիան և Գերմանիան արգելեցին զենքի արտահանումն Ադրբեջան և, որքանով որ մենք տեղյակ ենք, ԱՄՆ-ը նույն պես թույլ չի տալիս զենքի արտահանումն այդ երկիր' այն մտահոգությամբ, որ դա կարող է օգտագործվել Հայաստանի դեմ:

Սակայն, Haaretz-ի և մի շարք այլ լրատվամիջոցների հրապարակումների համաձայն, 2012 թվականին Իսրայելը 1.6 միլիարդ դոլար արժողությամբ զենք ու զինամթերքի մատակարարման պայամանագիր է կնքել Ադրբեջանի հետ: «Առնվազն երկու իսրայելական անօդաչու ինքնաթիռներ են ընկել Լեռնային Ղարաբաղի տարածքում, ամենավերջինն' այս օգոստոսին»,- նկատում է պատմաբանը: