Բրիտանացի պատանդն ԻՊ-ի տեսագրության մեջ պատմել է գերիների խոշտանգումների մասին

«Իսլամական պետություն» (ԻՊ) ծայրահեղական խմբավորման զինյալները տարածել են բրիտանացի պատանդ Ջոն Քանթլիի հետ թվով հինգերորդ տեսագրությունը: Ինչպես հաղորդել է The Independent թերթը, նոր սյուժեն ստացել է «Փոխարինաբար ինձ տվեք ձեր ականջները» անվանումը (Lend me your ears), տեղեկացնում է «Արմենպրես»-ը:

Քանթլին պատմել է, որ ԻՊ-ի այն գերիները, որոնք փորձել են փախչել, ենթարկվել են ջրահեղձում նմանակող կտտանքների: «Այժմ, եթե մենք չենք փորձում ինչ-որ հիմար բան անել, օրինակ փախուստ կամ այն, ինչ մենք չպետք է անենք, ԻՊ-ն մեզ հետ լավ է վերաբերվում,- պատմել է նա:- Մեզնից ոմանց, ովքեր փորձել են փախչել, մեր առևանգիչները ենթարկել են խոշտանգումների, այնպիսի խոշտանգումների, ինչպես վարվում էին ամերիկացի բանտապանները մուսուլման բանտարկյալների հետ»:

Լրագրող Ջոն Քանթլին զինվորական լուսանկարիչ էր և The Sunday Times, The Sun, The SundayTelegraph թերթերի թղթակից: 2012 թվականին զինյալները նրան առևանգել են Սիրիայում, հաղորդել է ՏԱՍՍ-ը: