«Ղրղզստանը, մտնելով Մաքսային միություն, ընտրում Է չարյաց փոքրագույնը». նախագահ Աթամբաև

Մաքսային միություն Ղրղզստանի մտնելուց հետո հանրապետությունում հնարավոր է ինֆլյացիայի աճ և գների բարձրացում, սակայն հակառակ դեպքում երկիրը կբախվի էլ ավելի մեծ սոցիալ-տնտեսական խնդիրների: Այդ մասին, ինչպես տեղեկացնում է «Արմենպրես»-ը, հայտարարել է Ղրղզստանի նախագահ Ալմազբեկ Աթամբաևը՝ Բիշքեկում ելույթ ունենալով կայուն զարգացման ազգային խորհրդի նիստի ընթացքում:

«Եթե մենք հրաժարվեք այդ կազմակերպություն մտնելուց, ապա մեզ սպասում է ռիսկերի ուժեղացված տարբերակ,-ասել է նա:- Այդ կազմակերպության անդամ երկրներին վիրավորելու համար չի ասվում, բայց մենք ընտրում ենք երկու չարյաց փոքրագույնը, մենք այլ ելք չունենք»: Նրա կարծիքով՝ հանրապետությունը պետք է ՄՄ-ին միանա հենց այժմ, որպեսզի հավասար պայմաններ ու իրավունքներ ունենա միավորման մնացած մասնակիցների հետ, ինչպես նաև ստանա որոշակի արտոնություններ, վարկեր և դրամաշնորհներ: Դրա հետ մեկտեղ նախագահը «լավ» է համարել Մաքսային միություն Ղրղզստան ի ընդունման պայմանները, այդ թվում նաև 1 միլիարդ դոլարի չափով երկրի զարգացման հիմնադրամի ստեղծումը: «Մեզ համար այժմ գլխավորը երկրի կայունությունը պահպանելն է»,-նշել է Աթամբաևը:

Ղրղզստանի իշխանությունները Մաքսային Միություն մտնելու որոշումն ընդունել են 2011 թվականի գարնանը: 2014 թվականի մայիսին բոլոր շահագրգիռ կողմերը հաստատել են Բելառուսի, Ղազախստանի և Ռուսաստանի տնտեսական դաշինքին հանրապետության միանալու ծրագիրը: «Ճանապարհի քարտեզի» համաձայն՝ Ղրղզստանը պետք է դառնա ՄՄ-ի լիիրավ անդամ և մինչև հաջորդ տարվա հունվարի 1-ը մտնի Միասնական տնտեսական տարածք: Ներկայում Ղրղզստանի խորհրդարանը քննարկում է օրինագծեր, որոնք կապված են այդ ինտեգրացիոն գործընթացների հետ, հաղորդել է ՏԱՍՍ-ը: