Նիգերիայում «Բոկո հարամ»-ի զինյալները ևս 30 երեխայի են առևանգել

«Բոկո հարամ» արմատական իսլամիստական խմբավորման ծայրահեղակտականները 30 երեխաների են առևանգել Նիգերիայի հյուսիս-արևելքում, տեղեկացնում է «Արմենպրես»-ը՝ հղում անելով CNN-ին: «Վերջին երկու օրվա ընթացքում «Բոկո հարամ»-ի զինյալները Մաֆա քաղաքում առևանգել են 30 երեխաների՝ 13 տարեկան տղաների և 11 ու ավելÕ « բարձր տարիքի աղջիկների»,-հայտնել է Մաֆա քաղաքի քաղաքագլուխ Մալեմ Աշիխ Մուստաֆան:

Նա հավելել է, որ հարձակման ընթացքում զինյալները տարել են նաև 300 կովերի:

Ավելի վաղ հաղորդվել էր, որ «Բոկո հարամ»-ի զինյալները 17 մարդ են սպանել Նդոնգո գյուղում:

Հոկտեմբերի 17-ին երկրի իշխանությունները հայտարարել էին «Բոկո հարամ»-ի հետ զինադադար կնքելու, ինչպես նաև այն մասին, որ պայմանավորվածություն է ձեռք բերվել ավելի վաղ առևանգված 219 դպրոցական աղջիկների ազատ արձակման շուրջ: Ինչպես ճշտում է BBC-ն, «Բոկո հարամ»-ի անդամներն այդպես էլ չհաստատեցին Նիգերիայի իշխանությունների հետ հրադադարի ձեռքբերման վերաբերյալ տեղեկատվությունը:

2014 թվականի ապրիլին «Բոկո հարամ»-ի զինյալներն առևանգել էին 270-ից ավելի նիգերիացի դպրոցական աղջիկների: Խմբավորման պարագլուխն առաջարկել էր աղջիկներին փոխանակել բոլոր ձերբակալված զինյալների հետ, սակայն երկրի կառավարությունը հրաժարվել էր այդ առաջարկությունից:

«Բոկո հարամ»-ը Նիգերիայում գործող արմատական իսլամիստական խմբավորում է: Նրա զինյալները պատասխանատու են երկրում կատարված ահաբեկչական գործողությունների մեծամասնության համար: Խմբավորումը հանդես է գալիս կրթության արևմտյան մոդելի դեմ և ձգտում է ամբողջ երկրում հասնել շարիաթի հաստատմանը, հաղորդել է ՌԻԱ Նովոստին: