Էբոլա տենդի համաճարակը կտևի մինչև մեկ տարի. փորձագետ

Արևմտյան Աֆրիկայում Էբոլա տենդի հարուցած հիվանդության համաճարակը կարող է տևել ևս «վեց ամիսից մինչև մեկ տարի»: Ինչպես տեղեկացնում է «Արմենպրես»-ը, այս կանխատեսումն է արել բելգիացի հայտնի մանրէաբան Պիտեր Պիոտը՝ այն առաջատար մասնագետներից մեկը, որը կանգնած է 1976 թվականին այս վիրուսի հայտնաբերման ակունքների մոտ: Նա ժամանել է Հոնկոնգ՝ մասնակցելու գիտաժողովի:

«Այն, ինչ մենք այսօր տեսնում ենք, ամեն ամիս ախտահարվածների թվի կրկնապատկումն է»,- հավաստել է գիտնականը, որի խոսքը հոկտեմբերի 28-ին մեջբերել է South China Morning Post թերթը: Նա նշել է, որ Էբոլա վիրուսի հարուցած հիվանդության դեմ պատվաստանյութի մշակմամբ զբաղվում են երեք դեղագործական ընկերություններ, սակայն պատրաստուկներից մեկի ամենավաղ արդյունքները կարող են պատրաստ լինել փետրվարին:

Պրոֆեսորի կարծիքով, որը Լոնդոնի Հիգիենայի և արևադարձային բժշկագիտության դպրոցի տնօրենն է և Առողջապահության համաշխարհային կազմակարեպության (ԱՀԿ) խորհրդատուն, համաճարակաբանական իրադրությունը վերահսկողության տակ վերցնելու լավագույն միջոցը կլինի արյան «անվտանգ և էժան» արագ-թեստերի օգտագործումը, որոնք թուլ կտան 10 րոպեում հայտնաբերել Էբոլա վիրուսով վարակումը:

Արծարծելով վիրուսի հետագա տարածման կանխատեսումները՝ կենսաբանը մեծ է համարել դրա հայտնվելու հավանականությունը Չինաստանում:

ԱՀԿ-ի վերջին տվյալներով՝ Էբոլա վիրուսի հարուցած հիվանդությամբ ախտահարված մարդկանց թիվը հասել է 10 141-ի, ևս 4 922-ը մահացել է, հաղորդել է ՏԱՍՍ-ը: