«Ռուսաստանը և Ուկրաինան պետք է պահպանեն եղբայրական բարեկամության և փոխշահավետության ավանդույթները». Պուտին

ՌԴ նախագահ Վլադիմիր Պուտինը գտնում է, որ չափազանց կարևոր է ֆաշիստական գաղափարախոսության վերածննդի ցանկացած փորձի և Ռուսաստանի և Ուկրաինայի ընդհանուր պատմության կեղծմանը հակազդելը։ Այդ մասին հայտնել է ՏԱՍՍԸ՝ վկայակոչելով շնորհավորանքը, որը նախագահը հղել է Հայրենական մեծ պատերազմի վետերաններին, Ուկրաինայի ժողովրդին՝ ֆաշիստ զավթիչներից երկիրն ազատագրելու 70-ամյակի կապակցությամբ:  

«Հայրենական մեծ պատերազմի տարիներին Ուկրաինայի համար ծանր, արյունալի մարտերում ողջ վեհությամբ է դրսևորվել մեր բազմազգ ժողովրդի ոգու ուժը և համախմբվածությունը, ազատագրիչների, պարտիզանների, թիկունքը պահողների խիզախությունը և տոկունությունը»,- ասվում է նախագահի ուղերձում։

«Մեր հայրերն ու պապերը միասին անձնվիրաբար պայքարել են Հայրենիքի ազատության և անկախության համար, ոչնչացրել են թշնամուն և մոտեցրել երկար սպասված հաղթանակը։ Մենք պետք է զգուշորեն պահպանենք մեզ ժառանգած եղբայրական բարեկամության ավանդույթները։ Շատ կարևոր է դաստիարակել աճող սերնդին բարձր հայրենասիրական արժեքներով, ակտիվ հակադարձել ֆաշիստական գաղափարախոսության ցանկացած փորձի, ազգամիջյան տարաձայնությունների առաջացմանը և մեր ընդհանուր պատմության կեղծմանը»,- ասվում է Պուտինի նամակում։

ՌԴ նախագահը «Ուկրաինայի վետերաններին քաջառողջություն, բարեկեցություն է մաղթել, իսկ  Ուկրաինայի ողջ եղբայրական ժողովրդին՝ խաղաղություն և բարգավաճում»: