Վրաստանի պաշտպանության նախարարության պաշտոնյաներ են ձերբակալվել 2,3 մլն դոլար վատնելու համար

Հոկտեմբերի 28-ին ձերբակալվել են Վրաստանի պաշտպանության նախարարության մի շարք բարձրաստիճան պաշտոնյաներ, որոնք մեղադրվում են 4 մլն 102 հազար լարիի (շուրջ 2,3 մլն ԱՄՆ-ի դոլար) չափով պետական միջոցներ վատնելու համար: Այդ մասին, ինչպես տեղեկացնում է «Արմենպրես»-ը, հայտնել է Վրաստանի գլխավոր դատավազությունը:

«Թբիլիսիի քաղաքային դատարանի որոշման հիման վրա այսօր Գլխավոր դատախազության կողմից ձերբակալվել են պաշտպանության նախարարության պետական գնումների դեպարտամենտի նախկին ղեկավար Գիզո Գլոնտին, Վրաստանի զինված ուժերի գլխավոր շտաբի կապի և տեղեկատվական տեխնոլոգիաների դեպարտամենտի պետ Նուգզար Կաիշաուրին, պաշտպանության նախարարության պետական գնումների դեպարտամենտի վարչության պետ Գեորգի Լոբժանիձեն, պետական գնումների դեպարտամենտի գլխավոր մասնագետ Արչիլ Ալավիձեն և Վրաստանի զինված ուժերի գլխավոր շտաբի կապի ու տեղեկատվական տեխնոլոգիա ների դեպարտամենտի վարչության ղեկավար Դավիթ Ծիպուրիան»,-ասված է հաղորդագրության մեջ:

Ըստ դատախազության տվյալների՝ բարձրաստիճան պաշտոնյաները մեղադրվում են պաշտպանության նախարարության հայտամրցույթի արդյունքները կեղծելու և պետական միջոցները հօգուտ Silknet հաղորդակցական ընկերության վատնելու մեջ:

«Խոշոր չափով բյուջետային միջոցներ վատնելու համար բոլոր ձերբակալվածներին մեղադրանքներ կներկայացվեն 48 ժամվա ընթացքում»,-նշել է Գլխավոր դատախազությունը, հաղորդել է «Նովոստի Գրուզիան»: