Հարավային Օսիային չի հետաքրքրել ինքնավարության վերաբերյալ Ղարիբաշվիլիի առաջարկը

Հարավային Օսիայի իշխանությունները Վրաստանի վարչապետ Իրակլի Ղարիբաշվիլիի հայտարարությունը, որն աբխազներին ու օսերին ինքնավարություն է առաջարկել Վրաստանի կազմում, գնահատել են «դատարկ խոսակցություն»:

«Մեզ հետաքրքիր չեն այդ դատարկ խոսակցությունները»,-ասել է Հարավային Օսիայի արտաքին գործերի նախարար Դավիթ Սանակոևը՝ մեկնաբանելով Ղարիբաշվիլիի արած հայտարարությունը: Նա հավելել է, որ «Հարավային Օսիան 25 տարի անկախ պետություն է և արդեն վեց տարի է, ինչ այդ անկախության ճանաչում է ստացել»:

Ղարիբաշվիլին նախօրյակին Թբիլիսիում կայացած մամուլի ասուլիսում աբխազներին ու օսերին ինքնավարություն և եվրոպական հեռանկար է առաջարկել Վրաստանի կազմում:

«Ցանկանում եմ մեկ անգամ ևս դիմել մեր աբխազ և օս եղբայրներին. մենք նույն հողի զավակներն ենք, սա մեր տարածքն է, մեզ միավորում է նույն ցավը, և մենք պետք է միասին շարունակենք ճանապարհը դեպի ապագա: Մենք իրոք ցանկանում ենք մեր աբխազ և օս եղբայրների հետ միասին ապրել միասնական Վրաստանում»,- հայտարարել է Ղարիբաշվիլին:

«Ձեզ մոտ դեռևս կարող է վստահության խնդիր լինել, բայց նայեք մեր քաղաքականությանը, մեր մոտեցմանը: Մենք իրոք մեծ զարգացման հեռանկար ունենք, բայց մենք չենք ցանկանում զարգացում առանց ձեզ: Այնպես որ ցանկանում եմ ևս մեկ անգամ կոչ անել մեր բոլոր աբխազ և օս եղբայրներին՝ մեկ անգամ ևս լավ վերլուծեք և մտածեք: Դուք ունեցել եք ինքնավար հանրապետություն, և մենք նույնն ենք առաջարկում՝ ինքնավարություն, բայց միասնական ուժեղ Վրաստանի կազմում»,-հավելել է Ղարիբաշվիլին, հաղորդել է ՌԻԱ Նովոստին: