Նավթադոլարներն ադրբեջանցիներին որակապես չփոխեցին. փորձագետ

Բաքվում անցկացված Էներգետիկայի կարգավորողների ռեգիոնալ ասոցիացիայի 13-րդ տարեկան կոնֆերանսում ունեցած ելույթում Ադրբեջանի տնտեսության և արդյունաբերության փոխնախարար Նիյազի Սաֆարովը հայտնել է, որ անկախության տարիների ընթացքում երկրի տնտեսության մեջ 190 մլրդ դոլարից ավելի ներդրումներ են կատարվել:

Ինչպես հաղորդում է «Արմենպրես»-ը, «Ազադլգ»-ի այն հարցին, թե 190 մլրդ դոլար ինվեստիցիան փոքր թիվ չէ, արդյոք այն երևո՞ւմ է Ադրբեջանի ենթակառուցվածքներում, այլ խոսքով' երկիրը նմա՞ն է 190-միլիրադանոց հայրենիքի, թե ոչ, տնտեսագետ-փորձագետ Նաթիգ Ջաֆարլին ասել է, որ այդ ներդրումների մեծ մասն ուղղվել է նավթագազային հատվածին:

Նրա խոսքով' փոփոխություններ եղել են այն առումով, որ ֆիզիկապես հնացած որոշ ենթակառուցվածքներ վերանորոգվել են, օրինակ' միջոցներ են ուղղվել դպրոցների, հիվանդանոցների վերանորոգմանը կամ նորերի կառուցմանը: Այդ ներդրումների շրջանակում հարկադիր վերաբնակների համար ավաններ են կառուցվել, Բաքու-Օղուզ-Գաբալա ջրագիծն է անցկացվել:

Փորձագետը նշել է, որ տեսանելի աստիճանի քանակական փոփոխությունների հետ որակական փոփոխություն չի ապահովվել:

«Դպրոցների շինարարության և վերանորոգման դիմաց բարձրագույն հաստատություններ ընդունելության անցողիկ միավորները բավականաչափ իջեցվել են: Քանակական փոփոխությունները որակականի չեն փոխվել: Այդ նույնն է նաև առողջապահության բնագավառում: Մեր քաղաքացիներն ախտորոշման և բուժվելու համար դեռևս շարունակում են հարևան երկրներ մեկնել»,- նշել է նա:

Նաթիգ Ջաֆարլիի խոսքով' ամենացավալի վիճակն այն է, որ այդչափ ներդրումներն ու ենթակառուցվածքների նորացումն ավարտվեցին միայն ֆիզիկական զարգացմամբ:

«Այդչափ մեծ գործը որակական փոփոխությունների և առաջադիմության չբերեց: Այսօր Ադրբեջանի ամենազգայուն տեղը առաջադիմության թեման է: Չնայած այդքան մեծ չափի ներդրումներին, որակական փոփոխություններ տեղի չունեցան»,- ասել է ադրբեջանցի տնտեսագետ-փորձագետը: