Ռուսաստանաբնակ ադրբեջանցի օլիգարխը մեղադրվում է ահաբեկչության ֆինանսավորման մեջ

Ռուսաստանի Դաշնության Կոմի Հանրապետությունում ձերբակալվել է Կոմիի պետխորհրդի պատգամավոր, «Ուխտանեվթեգազգեոլոգիա» ընկերության՝ ծագումով ադրբեջանցի գլխավոր տնօրեն Աքիֆ Սայադովը, ով կասկածվում է մի շարք տնտեսական հանցագործություններ կատարելու, այդ թվում՝ միջազգային ահաբեկչությանը ֆինանսապես աջակցելու մեջ:

Այս մասին, ինչպես հաղորդում է «Արմենպրես»-ը, ՏԱՍՍ-ին հայտնել են տարածաշրջանային հետաքննչական վարչությունում:

Աքիֆ Սայադովը, ով ծննդով Նախիջևանի Ջուլֆայի շրջանից է, 1977 թվականից աշխատում է ՌԴ նավթագազային արդյունաբերության հատվածում: 2008 թվականից նա գլխավորում է «Ուխտանեվթեգազգեոլոգիա» ընկերությունը:

«Ռոսբալտ»-ը երեկ հայտնել է, որ ՌԴ դաշնային անվտանգության ծառայության կողմից Սիրիայում «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման համար ֆինանսավորման աղբյուրների և մարտիկներ հավաքագրողների հայտնաբերելու ուղղությամբ վերջին երկու շաբաթվա ընթացքում անցկացված մասշտաբային հատուկ գործողությունների ժամանակ ձերբակալվել են ծնունդով Ադրբեջանից 6 քաղաքացիներ: Ձերբակալվածները Մոսկվայում Սկոտոպրոգոննի կառանցում գտնվող ավտոսպասարկման կետի 6 աշխատակիցներն են, այդ թվում՝ տնօրենը:

Նշվում է, որ ՌԴ իրավապահներին հայտնի է դարձել, որ ավտոսպասարկման կետից ստացվող միջոցների մի մասը հոսում է Սիրիա: Ավելին, բանվորները և նրանց ղեկավարը Ադրբեջանից եկածների մեջ սկսել են տարածել իրենց գաղափարները, առաջարկել մեկնել Սիրիա: Ըստ գործակալության՝ ՌԴ դաշնային անվտանգության ծառայությունը գտնում է, որ այդ անձինք կարող են վտանգ ներկայացնել Ռուսաստանի համար, և նրանց բերման են ենթարկել ԻԼԻՊ-ին ֆինանսավորելու կասկածանքով: