Քեմերոնը մերժել է Մեծ Բրիտանիայում թմրանյութերն օրինականացնելու առաջարկը

Մեծ Բրիտանիայի վարչապետ Դևիդ Քեմերոնը մերժել է երկրում թմրանյութերն օրինականացնելու առաջարկները: Դրանք հնչել են ՆԳ նախարարության փորձագետների զեկույցի հրապարակումից հետո, որը կասկածի տակ է դրել հոգեմետ նյութերի առևտրի դեմ պայքարում կիրառվող խիստ մոտեցումները:

Ինչպես հայտարարել է Մեծ Բրիտանիայի կառավարության նախարար Նորման Բեյքերը, թմրամոլների նկատմամբ օրենքների խստացումը չի նվազեցնում թմրանյութերի օգտագործման մակարդակը, ինչը ապացուցում է թմրանյութերի դեմ մղվող պայքարում մյուս երկրների փորձի ուսումնասիրությունը:

Նա ընդգծել է, որ ժամանակն է՝ դադարեցնել այդ թեմայով անիմաստ վեճերը և կենտրոնանալ բացառապես թմրակախվածություն ունեցող մարդկանց բուժվելու վրա:

Զեկույցում նաև նշվում է, որ բրիտանացի մասնագետներն ուսումնասիրել են, մասնավորապես, այնպիսի երկրների փորձը, ինչպիսին Պորտուգալիան է, որտեղ քրեական հետապնդում չի նախատեսվում ոչ մեծ քանակությամբ թմրանյութեր գործածելու համար: Այդ երկրում իրադրությունը լավացել է, քանի որ թմրամոլներին բուժում են առաջարկում և չեն սպառնում քրեական հետապնդմամբ:

«Փաստերն ապացուցում են, որ այն, ինչ մենք անում ենք, արդյունք է տալիս: Ես չեմ հավատում թմրանյութերի ապաքրեականացմանը»,- հայտարարել է Քեմերոնը:

«Ես երեք երեխաների հայր եմ և չեմ ցանկանում այնպիսի տպավորություն ստեղծել, որ թմրանյութերի գործածումը նորմալ է և անվտանգ, որովհետև, անկեղծ ասած, դա այդպես չէ»,- նշել է բրիտանական կառավարության ղեկավարը:

Վարչապետի դիրքորոշմանն աջակցել է Լեյբորիստական կուսակցության «ստվերային կաբինետում» ներքին գործերի նախարար Դայանա Ջոնսոնը: Նա հանդես է եկել թմրանյութերի նկատմամբ խիստ մոտեցումը պահպանելու օգտին: Նրա կարծիքով՝ թմրամոլներին ցուցաբերվող բժշկական օգնության մասշտաբները կախված են միայն այդ նպատակով կատարվող ծախսերի չափից: «Մեծ Բրիտանիայում թմրամոլների 60 տոկոսը բուժում է անցնում՝ Նիդեռլանդների 12 տոկոսի և Շվեդիայի 25 տոկոսի համեմատությամբ»,- ասել է լեյբորիստ քաղաքական գործիչը, հաղորդել է ՏԱՍՍ-ը: