Թուրքիան Վրաստանի դաշնակիցն է ու ռազմավարական գործընկերը. Ղարիբաշվիլի

Վրաստանի կառավարության ղեկավար Իրակլի Ղարիբաշվիլին նոյեմբերի 3-ին հանդիպում է ունեցել պաշտոնական այցով Վրաստանում գտնվող Թուրքիայի Ազգային մեծ ժողովի (Մեջլիս) նախագահ Ջեմիլ Չիչեկի հետ և քննարկել համագործակցության հարցեր, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

Զրույցի հիմնական թեմաներն են եղել երկրների միջև համագործակցության խորացումը, այդ թվում՝ առևտրատնտեսական հարաբերությունների զարգացումը և միջխորհրդարանական բարեկամության խմբի ակտիվացումը: «Ինչպես նշվել է հանդիպման ժամանակ, Թուրքիան Վրաստանի թիվ մեկ առևտրական գործընկերն է»,- հաղորդել է կառավարության մամուլի ծառայությունը:

Վարչապետի խոսքով՝ Վրաստանը Թուրքիան դիտում է որպես հուսալի դաշնակից ու ռազմավարական գործընկեր և մեծ կարևորություն է տալիս երկրի եվրատլանտյան ձգտումներին Անկարայի աջակցությանը: Հանդիպմանը նաև ննշվել է Բաքու-Թբիլիսի-Կարս երկաթուղային մայրուղու նախագծի կարևորությունը, որը կխորացնի տարածաշրջանային համագործակցությունը տրանսպորտի ու առևտրի բնագավառներում:

Թուրքիայի Մեջլիսի նախագահը եռօրյա պաշտոնական այցով Վրաստան է ժամանել նոյեմբերի 2-ի երեկոյան: Այցի շրջանակներում պլանավորված են Վրաստանի և Թուրքիայի խորհրդարանների ղեկավարների բանակցությունները:

Նոյեմբերի 4-ին Ջեմիլ Չիչեկը կուղևորվի Բաթում, որտեղ հանդիպում կունենա Աջարիայի Ինքնավար Հանրապետության կառավարության նախագահ Արչիլ Խաբաձեի հետ: