Հայաստանյան պատվիրակության համար կարևոր դրույթներ ՍԾՏՀ ԽՎ կանոնակարգում

Սևծովյան տնտեսական համագործակցության խորհրդարանական վեհաժողովի կանոնակարգում ներառվել են մի շարք կարևորագույն դրույթներ, որոնք ապահովում են փոքր երկրների պատվիրակությունների իրավունքների իրացման հնարավորությունը: Այս մասին նոյեմբերի 7-ին լրագրողների հետ հանդիպմանը տեղեկացրեց ՀՀ ԱԺ ՀՀԿ խմբակցության պատգամավոր, Սևծովյան տնտեսական համագործակցության խորհրդարանական վեհաժողովի հայաստանյան պատվիրակության ղեկավար Գագիկ Մինասյանը, ում գլխավորած պատվիրակությունը նոյեմբերի 3-4-ը Ստամբուլում մասնակցել է խորհրդարանական վեհաժողովի աշխատանքներին: «Խնդիրը կայանում է նրանում, որ այդ կառույցն ունի իր աշխատակազմի մասը և ունի նաև հանձնաժողովներ, որոնք ունեն նախագահներ և տեղակալներ: Եվ ահա այս երկու խումբ պաշտոններում ավանդաբար ընտրվում էին մեծ պատվիրակություն ունեցող պետությունների ներկայացուցիչները, ովքեր շատ ավելի շատ ձայներ ունեին»,- «Արմենպրես»-ի հաղորդմամբ՝ նշեց Մինասյանը:

Պատգամավորն ընդգծեց, որ փոքր պատվիրակություն ունեցող երկրները՝ այդ թվում նաև Հայաստանը, կարողացել են համախմբել ջանքերը և կանոնակարգում անել մի շարք փոփոխություններ: «Այդ փոփոխություններից կարևորագույննները հետևյալն էին. աշխատակազմում յուրաքանչյուր երկիր կարող է ունենալ ընդամենը մեկ ներկայացուցիչ, ինչպես նաև հանձնաժողովի նախագահների և տեղակալների առումով յուրաքանչյուր երկիր կարող է ունենալ միայն մեկ ներկայացուցիչ: Ստամբուլում ես տեղեկացա, որ ստեղծվել է կանոնակարգի աշխատանքային խումբ, որն, ըստ էության, փորձում էր աշխատակազմի մասով չեզոքացնել այդ դրույթը: Իհարկե, դա մեզ համար չափազանց ծանր կլիներ, որովհետև տևական աշխատանքներից հետո մենք ակնկալում էինք, որ այս տարվա դեկտեմբերին Աթենքում կայանալիք վեհաժողովի նստաշրջանի ժամանակ Հայաստանն աշխատակազմում կունենա իր ներկայացուցիչը: Սա չէր կարելի թույլ տալ, և ես մասնակցեցի այդ աշխատանքային խմբի նիստին: Նորից պետք է ասեմ, որ մեծ պատվիրակություն ունեցող երկրները բավականին նեգատիվ դրսևորում էին ցուցաբերում կանոնակարգի այդ կետի հետ կապված: Սակայն մեր դիքորոշումը չափազանց հստակ էր, որ այդ ձեռքբերումը շատ կարևոր է կազմակերպության համար, և դրանից ցանկացած նահանջ կարող է խաթարել կազմակերպության արդյունավետ աշխատանքը»,- նշեց Մինասյանը:

Նա ընդգծեց, որ երկար բանավեճից հետո նրանք հասել են շատ կարևոր ձեռքբերման, որը ձեռնտու է նաև Հայաստանի համար: Եկող տարվա փետրվարից վեհաժողովի և աշխատակազմի, և հանձնաժողովների մասով կանոնակարգում Գագիկ Մինասյանի առաջարկությամբ կավելացվի նոր դրույթ, որը թույլ կտա, որպեսզի ավելի վաղ մշակված գաղափարն ընթացակարգային դրսևորումներ ունենա: «Ես մեկ շաբաթվա ընթացքում վեհաժողովին կներկայացնեմ մի դրույթ, ըստ որի ընդհանրապես որևէ պաշտոնի համար չի կարող առաջադրում ունենալ մի երկիր, որն արդեն աշխատակազմում կամ հանձնաժողովում ունի իր ներկայացուցիչը կամ կարող է ունենալ այդ հնարավորությունը, եթե այդ պաշտոնին անցումը տեղի է ունենալու ավելի ուշ, քան նախորդ անդամի պաշտոնանկ լինելը: Նա ընդգծեց, որ այս ձևակերպումը բավականին բուռն քննարկումներից հետո բոլորի համար ընդունելի է եղել»,- նշեց Մինասյանը՝ հավելելով, որ նիստը վարողն էլ է հստակ արձանագրել, որ այս ձևակերպումն ընդունելի է և արձանագրել է, որ դրանից նահանջ չի կարող լինել: