Կապանի մայր ջրագծի վթարի հետևանքով տուժածները կստանան անհրաժեշտ ֆինանսական փոխհատուցում

Նոյեմբերի 2-ին Կապանը սնուցող մայր ջրագիծի վթարի հետևանքով վնասվել էր հարակից Բաղաբերդ թաղամասի 17-րդ շենքը: Վնասվել են շենքի տանիքը, ընդհանուր օգտագործման տարածքները, 15 բնակարան, շենքի առաջին հարկում գործող մանկապարտեզը, բակային տարածքն ու բակում կայանված 5 ավտոմեքենաներ:

Նոյեմբերի 3-ին մարզպետ Սուրիկ Խաչատրյանը «Հայջրմուղկոյուղի» ՓԲԸ գլխավոր տնօրեն Պատրիկ Լորենի և Կապանի քաղաքապետ Աշոտ Հայրապետյանի հետ հանդիպեցին վթարից տուժած բնակարանների բնակիչներին: Քաղաքապետ Աշոտ Հայրապետյանը ներկայացրեց բնակչությանը հասված վնասի չափի նախնական հաշվարկները, բնակիչների ժամանակավոր բնակեցման խնդիրները:

Մարզպետ Սուրիկ Խաչատրյանը, մինչ հնարավոր էլեկտրական հոսանքի և գազի անվտանգ մատակարարման վերականգնումը բնակիչներին ապահովեց վառելափայտով և վառարաններով:

ՀՀ Սյունիքի մարզպետարանում կայացած խորհրդակցությունից հետո, մարզպետ Սուրիկ Խաչատրյանը ներկայացնելով խորհրդակցության արդյունքները, հավաստիացրեց, որ մայր ջրագծի վթարի հետևանքով տուժածները, կստանան անհրաժեշտ ֆինանսական փոխհատուցում և կարող կլինեն հաղթահարել վթարի հասցրած վնասները: