Շվեդիան կարևորում է Հայաստանի հետ տարբեր ոլորտներում համագործակցության ընդլայնումը. դեսպան

Արտաքին գործերի նախարար Էդվարդ Նալբանդյանն փետրվարի 16-ին ընդունել է Հայաստանում Շվեդիայի Թագավորության նորանշանակ դեսպան Մարտինա Քուիկին (նստավայրը՝ Թբիլիսի)՝ հավատարմագրերի պատճենի հանձնման կապակցությամբ: Շնորհավորելով դեսպան Քուիկին նշանակման կապակցությամբ՝ նախարար Նալբանդյանը նշել է, որ վերջին տարիներին զգալիորեն ակտիվացել են հայ-շվեդական հարաբերությունները, ինչն արտացոլվել է փոխայցելությունների, քաղաքական երկխոսության ինտենսիվությամբ, Երևանում և Ստոկհոլմում դեսպանությունների հիմնադրմամբ, Հայաստանի տնտեսության նկատմամբ շվեդական ընկերությունների հետաքրքրության աճով։ Նախարար Նալբանդյանը հույս է հայտնել, որ դեսպանն իր կարևոր ներդրումը կբերի հայ-շվեդական փոխգործակցության ընդարձակման գործում:

Շնորհակալություն հայտնելով ընդունելության և բարեմաղթանքների համար՝ դեսպան Քուիկն ընդգծել է, որ Շվեդիան կարևորում է Հայաստանի հետ տարբեր ոլորտներում համագործակցության ընդլայնումը, ինչի մասին վկայում է Երևանում Շվեդիայի դեսպանության հիմնումը: Դեսպան Քուիկը վստահեցրել է, որ իր գործունեության ընթացքում կանի առավելագույնը՝ երկու երկրների միջև համագործակցությունը ընդլայնելու և ամրապնդելու համար:

Զրուցակիցները հանգամանալից քննարկել են երկկողմ հարաբերությունների առավել զարգացման նպատակով ձեռնարկվելիք քայլերը, կարևորել արտգործնախարարությունների միջև պարբերական խորհրդակցությունների անցկացումը, միջխորհրդարանական շփումների ակտիվացումը, գործարար կապերի ընդլայնումը։

Հանդիպմանը անդրադարձ է արվել Հայաստան-Եվրոպական միություն համագործակցությանը, մի շարք հրատապ միջազգային խնդիրների։

Նախարար Նալբանդյանը ներկայացրել է ղարաբաղյան հիմնախնդրի խաղաղ կարգավորման ուղղությամբ Հայաստանի և ԵԱՀԿ Մինսկի խմբի համանախագահների կողմից ձեռնարկվող ջանքերը։