«Ժողովուրդ». Սերժ Սարգսյանը, փաստորեն, վերացնում է ՀՅԴ-ի հետ կրկին կոալիցիա կազմելու արգելքը

Սերժ Սարգսյանը շատերի համար անսպասելիորեն երեկ դիմեց ԱԺ նախագահ Գալուստ Սահակյանին` տեղեկացնելով Հայաստան-Թուրքիա արձանագրությունները խորհրդարանից հետ կանչելու վերաբերյալ իր որոշման մասին:

Այն, որ նա պատրաստվում էր ապրիլի 24-ից առաջ նման քայլ կատարել, ենթադրելի էր, առավել ևս, որ ինչպես Գ. Սահակյանին ուղղված նամակում հենց ինքն է հիշեցնում` Սերժ Սարգսյանը խոսել էր թուրքերին տրված ժամանակի անսպառ չլինելու մասին դեռևս անցած սեպտեմբերի վերջին' ՄԱԿ-ի գագաթաժողովում: Սակայն նա արձանագրությունները հետ կանչելու որոշումը չկայացրեց ոչ Էրդողանի` Գալիպոլիի հարյուրամյակի ցինիկ հրավերքից, ո՛չ դրան հետևած պատասխանից, ո՛չ էլ անգամ Ցեղասպանության մասին համահայկական հռչակագրի ընդունումից հետո: Ասել է թե' այդ կարևոր քաղաքական որոշումը կայացնելու համար վերջին շրջանի բոլոր ինֆորմացիոն առիթները թողած' Ս. Սարգսյանը որոշեց արձանագրությունները հետ կանչել հենց երեկ` ներքաղաքական բարդագույն այս իրավիճակում:

Հարց է առաջանում` ինչո՞ւ: Իհարկե, առաջին պատասխանը, որը կարող է հնչել, ՀՅԴ-ի համակրանքը հենց այս լարված փուլում ստանալու մղումն է: Ի վերջո, չմոռանանք, որ Դաշնակցությունը տևական ժամանակ է, ինչ պահանջում է ոչ միայն արձանագրությունները հետ կանչել Աժ-ից, այլև, առհասարակ, հետ վերցնել ՀՀ ստորագրությունն այդ փաստաթղթերի տակից: Սա, ի դեպ, սահմանադրական բարեփոխումների հետ միասին հանդիսանում է ՀՅԴ-ի առաջարկած հայտնի 7 կետերից թերևս ամենասկզբունքայինը Դաշնակցության համար: Ի վերջո, չմոռանանք, որ ՀՅԴ-ն կոալիցիայից դուրս եկավ հենց հայ-թուրքական այս գործընթացի պատճառով, ուստի դադարեցնելով այն` Սերժ Սարգսյանը, փաստորեն, վերացնում է նաև ՀՅԴ-ի հետ կրկին կոալիցիա կազմելու արգելքը:

Շարունակությունը՝ թերթի այսօրվա համարում