Ջոհար Ցարնաևն իրեն մեղավոր է ճանաչել Բոստոնում իրականացված պայթյունների գործով

Բոստոնում սկսվել է դատավարությունը երկու տարի առաջ մարաթոնի ժամանակ կատարված պայթյունների գործով: Նիստի սկզբում մեղադրյալ Ջոհար Ցարնաևի փաստաբանը երդվյալներին հայտարարել է, որ իր պաշտպանյալն ընդունում է իր մեղքը, տեղեկացնում է «Արմենպրես»-ը՝ հղում անելով BBC-ին:

Նրա խոսքով՝ ինքը մտադիր է պաշտպանությունը կառուցել այն հիմքի վրա, որ Ցարնաևը գտնվել է իր ավագ եղբոր՝ Թամեռլան Ցարնաևի ազդեցության ներքո:

21-ամյա Ջոհար Ցարնաևին սպառնում է մահվան դատավճիռ. նրան մեղադրանքներ են առաջադրվել ավելի քան 30 կետով:

Մարտի 4-ին դատավարության սկսվելուց հետո ֆեդերալ դատախազը հայտարարել է, որ երբ Ցարնաևը ռումբեր էր դնում, սպանություն էր ծրագրել:

2013 թվականին Ջոհար Ցարնաևը չէր ընդունել իր մեղքը Բոստոնի մարաթոնում ռումբերի պաթեցումների գործի բոլոր մեղադրանքներով:

Դատարանի դահլիճի ձախ մասը ներկայացնում էին պայթյունների հետևանքով տուժած մարդիկ:

2013 թվականի ապրիլին երեք մարդ, այդ թվում՝ ութամյա մի տղա, սպանվել են երկու պայթուցիկ սարքերի գործարկման հետևանքով, որոնք պատրաստված են եղել մեխերով և գնդառանցքակալներով լի պողպատե շուտեփուկ կաթսաներից:

Ավելի քան 260 մարդ վիրավորվել է, նրանցից շատերը զրկվել են վերջույթներից: