Բժիշկները 80 կար են դրել հարձակման ենթարկված ԱՄՆ-ի դեսպանի վերքերին

Բժիշկները շուրջ 80 կար են դրել Հարավային Կորեայում Միացյալ Նահանգների դեսպան Մարկ Լիփերթի վերքերին, որոնք նա ստացել է Սեուլում հարձակման ենթարկվելու հետևանքով, տեղեկացնում է «Արմենպրես»-ը՝ հղում անելով BBC-ին:

Դիվանագետն ինքն իր «Թվիթեր»-ում գրել է, որ իրեն լավ է զգում և հիվանդանոցից դուրս կգա՝ հենց որ կարողանա:

Առավոտյան Սեուլում կայացած գործնական նախաճաշի ընթացքում ոչ մեծ դանակով Լիփերթի վրա էր հարձակվել մի տղամարդ և կտրել նրա դեմքն ու ձախ ձեռքը:

Հարձակվողը կալանավորվել է հանցանքի վայրում: Նա Կորեայի Հանրապետության 55-ամյա քաղաքացի Կիմ Գի Չժոն է, որը գլխավորում է «Ուրիմադան» ձախամետ քաղաքացիական կազմակերպությունը: Հարձակման ժամանակ չարագործը բղավել է, որ ինքը դեմ է պատերազմին և մարտի 2-ին սկսված Foal Eagle և Key Resolve ամերիկա-հարավկորեական համատեղ զորավարժություններին: Նա նաև պահանջել է Հարավային Կորեայի և ԿԺԴՀ-ի միավորումը:

Միացյալ Նահանգները «վճռականորեն դատապարտել է» դեսպանի վրա կատարված հարձակումը: ԱՄՆ-ի Պետդեպարտամենտի համապատասխան հայտարարությունը Վաշինգտոնում հնչեցրել է գերատեսչության մամուլի քարտուղարի տեղակալ Մարի Հարֆը: Իր հերթին, Սպիտակ տան Ազգային անվտանգության խորհրդի պաշտոնական ներկայացուցիչ Բեռնարդետ Միհենը հայտնել է, որ ԱՄՆ-ի նախագահ Բարաք Օբաման պատահարի կապակցությամբ հեռախոսով զանգահարել է Լիփերթին՝ «նրան մաղթելով արագ ապաքինում»: