Թուրքիայում այս տարի 55 կին է սպանվել

Թուրքիայում 2014 թվականին 294 կին է սպանվել, իսկ 2015 թվականի առաջին 65 օրերի ընթացքում՝ արդեն 55 կին:

Այս մասին, ինչպես հաղորդում է «Արմենպրես»-ը, հայտնում է թուրքական T24 լրատվական կայքը՝ նշելով, որ կանանց անպաշտպանվածության մակարդակով Թուրքիան աշխարհում առաջատար երկրների թվում է:

Նշվում է, որ սպանված կանանց մեծամասնության մարդասպանը հանդիսացել են նրանց ամուսինները կամ սիրեկանները: Տղամարդկանց նման հանցագործության դիմելու առիթը կանանց ամուսնալուծվելու ցանկությունը կամ էլ հաշտվելու առաջարկից հրաժարվելն է:

2015 թվականի մարտի 6 օրերի ընթացքում Թուրքիայում արդեն 7 կին է սպանվել:

Այս տարի Թուրքիայում սպանված կանանց 32 տոկոսը մահացել են դանակահարության, 30 տոկոսը՝ գնդակահարության, 12 տոկոսը՝ դաժան ծեծի արդյունքում: Կանանց ամենաշատ սպանությունը՝ 8 դեպք, կատարվել է Ստամբուլում:

Թուրք իրավապաշտպանների կարծիքով՝ Թուրքիայում կանանց անպաշտպանվածությունը բխում է սեփական կանանց նկատմամբ բռնության դիմած տղամարդկանց նկատմամբ դատաիրավական համակարգի մեղմ վերաբերմունքից: «Տղամարդու և կնոջ միջև հավասարության բացակայությունը խթանում է Թուրքիայում տղամարդու կողմից թույլ տրվող բռնությունը», -ամփոփել է կայքը:

Թուրքական ԶԼՄ-ներն ավելի վաղ հայտնել էին իշխող «Արդարություն և զարգացում» կուսակցության (AKP) կողմից կանանց հասցեին արված հետևյալ արտահայտությունները՝ «կնոջ և տղամարդու հավասարությունը հակասում է բնությանը», «հղիության արհեստական ընդհատումը հանցագործություն է», «մանկատներում աղջիկների և տղաների համատեղ բնակությունն անթույլատրելի է», «բռնություն գործադրող տղամարդը աբորտ անող կնոջից ավելի անմեղ է», «բռնաբարված կինը ևս չպետք է աբորտ անի», «առանց գլխաշորի կինը նման է առանց վարագույրի տան, իսկ առանց վարագույրի տունը կամ վաճառքի, կամ վարձակալելու համար է»: