Ադրբեջանի ՊՆ-ն և ուժային կառույցները թաքցնում են կորուստները. «Խազար»

Ադրբեջանական կասպյան ռազմական հետազոտությունների «Խազար» ինստիտուտի (Caspian Defense Studies Institute) կողմից անցկացված ԶԼՄ-ների մոնիտորինգի արդյունքում Ադրբեջանի անվտանգության և պաշտպանության հատվածում կորոսւտը 2015 թվականի սկզբից մինչ այժմ կազմել է 12 զինծառայող: Ընդ որում, կորուստներից 8-ը մարտական, իսկ 4-ը ոչ մարտական են:

Այս մասին, ինչպես հաղորդում է «Արմենպրես»-ը, հայտնում է ադրբեջանական Meydan TV հեռուստաալիքի կայքը:

7 զինծառայող զոհվել են հակառակորդի գնդակից, իսկ մեկը պայթել է ականի վրա: Ոչ մարտական կորուստներից երկուսը մահացել են ոչ կանոնադրական հարաբերությունների, մեկը' զենքի հետ անզգույշ վարվելու հետևանքով, մեկը' հիվանդությունից: Բացի այդ, 5 զինծառայող վիրավորվել կամ տարբեր մարմնական վնասվածքներ են ստացել:

Ինստիտուտը նշում է նաև, որ կորուստների մոնիտորինգի անցկացումը, նախորդ տարիների համեմատ, խիստ դժվարացել է, քանի որ Ադրբեջանի պաշտպանության նախարարությունը և մյուս ուժային կառույցները ձգտում են թաքցնել կորուստները: «Խազար»-ը հայտնել է, որ իշխանությունները ադրբեջանական բոլոր ԶԼՄ-ներին պատվիրել են մարտական կորուստների մասին տեղեկատվություն չտարածել:

«Խազար»-ը նաև նշել է մանաթի արժեզրկման հետ կապված Ադրբեջանի զինված ուժերում զինծառայողների սոցիալական պաշտպանվածության վատթարացման մասին:

«Զինծառայողների աշխատավարձերն առանց այն էլ չնչին են: Այսպես, թիկունքում ծառայող լեյտենանտները ամսական ընդամենը 500 մանաթ աշխատավարձ են ստանում, իսկ պայմանագրային ենթասպաներն ու սերժանտները' ավելի ցածր»,- նշել է ինստիտուտը:

«Խազարն» անդրադարձել է նաև ադրբեջանական բանակում առկա բնակարանային խնդիրներին. հազարից ավելի զինծառայող և ավելի պահուստի սպաներ գտնվում են բնակարանի հերթում, և հայտնի չէ, թե երբ նրանք բնակարան կստանան:

Ըստ ադրբեջանական ինստիտուտի' քանի բանակում բավարար սոցիալական պաշտպանվածություն չկա, ոչ կանոնադրական հարաբերությունների հետ խնդիրները, սպաների' կարիերայում առաջընթացի հետ կապված հույսերի բացակայությունը կշարունակեն մնալ:

Թեև Ադրբեջանը շարունակում է սեփական զինուժում գրանցված մահվան դեպքերի ու արտակարգ պատահարների մասին տեղեկությունները թաքցնելու քաղաքականությունը, այդուհանդերձ, ՀՀ ՊՆ և ԼՂՀ ՊԲ կողմից սեփական միջոցներով ձեռք բերված տեղեկությունների համաձայն' տարվա սկզբից մինչ այժմ ադրբեջանական բանակի կորուստները կազմել են առնվազը 36 զինծառայող և 27-ից ավելի վիրավոր: