Լոնդոնի քաղաքագլուխը քարոզելու է ԵՄ-ի կազմից Մեծ Բրիտանիայի դուրս գալու օգտին

Լոնդոնի քաղաքագլուխ Բորիս Ջոնսոնը հավաստել է, որ քարոզելու է ԵՄ-ի կազմից Մեծ Բրիտանիայի դուրս գալու օգտին: Այդ մասին, ինչպես տեղեկացնում է «Արմենպրես»-ը, կառավարող Պահպանողական կուսակցության ամենաազդեցիկ քաղաքական գործիչներից մեկը հայտարարել է փետրվարի 21-ին:

«Ես հանդես եմ գալու ԵՄ-ից դուրս գալու շուրջ քվեարկելու օգտին, որովհետև ես ավելի լավ գործարք եմ ցանկանում այս երկրի մարդկանց համար»,- ասել է Ջոնսոնը՝ հաստատելով ավելի վաղ բրիտանական ԶԼՄ-ներում հայտնված տեղեկատվությունն այն մասին, որ ինքը որոշել է ընդդիմադիր դիրք բռնել Պահպանողական կուսակցության առաջնորդի, վարչապետ Դևիդ Քեմերոնի նկատմամբ:

Նախարարների կաբինետի ղեկավարը փետրվարի 20-ին հայտարարել էր, որ ԵՄ-ին երկրի անդամակցության շուրջ հանրաքվեն կանցկացվի հունիսի 23-ին, և որ ինքն «ամբողջ սրտով ու հոգով» պայքարելու է հանուն այն բանի, որ Լոնդոնը չխզի հարաբերությունները Բրյուսելի հետ: Քեմերոնի կարծիքով՝ ԵՄ-ի բարենորոգման շուրջ ձեռք բերված համաձայնագիրը բավարար է, որպեսզի Մեծ Բրիտանիան մնա 28 պետությունից բաղկացած դաշինքի մասը:

Մինչդեռ Ջոնսոնը չի կարծում, որ այդ համաձայնագիրը լավն է: «Քեմերոնը ամեն ինչ ֆանտաստիկ լավ արեց: Եվ բոլորը պետք է պատշաճը մատուցեն նրան այն բանի համար, ինչի նա հասավ: Բայց, չեմ կարծում, որ որևէ մեկը կարող է իրապես հայտարարել, որ դա ԵՄ-ի արմատական բարեփոխում է»,- ասել է Ջոնսոնը:

Ընդհանուր առմամբ, Մեծ Բրիտանիայի վարչապետի թիմի յոթ անդամներ, ներառյալ Ջոնսոնը, քարոզելու են ԵՄ-ից դուրս գալու օգտին, այդ թվում՝ արդարադատության նախարար Մայքլ Գոուվը, որը համարվում է Քեմերոնի ամենամերձավոր զինակիցներից մեկը:

Ավելի վաղ BBC հեռուստաընկերության եթերում Քեմերոնը հորդորել է Լոնդոնի քաղաքագլխին՝ պաշտպանել իր դիրքորոշումը: «Ես Բորիսին կասեի նույնը, ինչը և բոլորին. մենք ավելի մեծ անվտանգության մեջ կլինենք, մեզ համար ավելի լավ կլինի ԵՄ-ի կազմում»,- ասել է Քեմերոնը:

Հանրային կարծիքի հարցման արդյունքների համաձայն, որոնք հրապարակել է Mail on Sunday բրիտանական թերթը, այն բրիտանացիների թիվը, ովքեր հանդես են գալիս հօգուտ ԵՄ-ին երկրի անդամակցության, 15 տոկոսով գերազանցում է նրանց, ովքեր կքվեարկեն հանրակցությունից դուրս գալու օգտին: Բրիտանացիների 48 տոկոսը կարծում է, որ երկրի համար ավելի լավ կլինի՝ մնալ ԵՄ-ի կազմում:

Հակառակ կարծիքին է հարցվածների 33 տոկոսը: Իրենց ընտրությունը չեն հստակեցրել հարցվածների 19 տոկոսը, հաղորդել է ՏԱՍՍ-ը: