Օբաման ողջունել է Սիրիայի շուրջ ձեռք բերված պայմանավորվածությունը

ԱՄՆ-ի նախագահ Բարաք Օբաման ողջունել է Սիրիայի շուրջ նոր պայմանավորվածությունը, որը ձեռք է բերվել Ռուսաստանի և ԱՄՆ-ի վճռորոշ դերակատարությամբ, և ընդգծել, որ այժմ կարևոր է այն կատարել: Այդ մասին, ինչպես տեղեկացնում է «Արմենպրես»-ը, ասված է Ռուսաստանի և ԱՄՆ-ի նախագահների միջև կայացած հեռախոսազրույցի արդյունքների վերաբերյալ Սպիտակ տան տարածած հաղորդագրության մեջ:

Փաստաթղթի համաձայն՝ երկու ղեկավարների զրույցի ընթացքում խոսվել է, «մի կողմից՝ սիրիական ռեժիմի ու նրա դաշնակիցների, և, մյուս կողմից, զինված ընդդիմության միջև մարտական գործողությունների դադարեցմանն ուղղված համազգային ջանքերի մասին»:

«ԱՄՆ-ի նախագահը ողջունել է այն փաստը, որ Միացյալ Նահանգների, Ռուսաստանի և Սիրիայի աջակցման միջազգային խմբի գծով մյուս գործընկերների միջև ըմբռնում է ձեռք բերվել մարտական գործողությունների դադարեցման պայմանների շուրջ,- ասված է մամուլի տեղեկագրում:- Նախագահ Օբաման ընդգծել է, որ այժմ գերակայությունը սիրիական ռեժիմի և զինված ընդդիմության դրական արձագանքն ապահովելն է, ինչպես նաև հակամարտության բոլոր մասնակիցների կողմից պայմանավորվածության բարեխիղճ կատարումը, որպեսզի մեղմացվեն Սիրիայի ժողովրդի տառապանքները, ակտիվացվի քաղաքակա ն գործընթացը ՄԱԿ-ի հովանու ներքո և ջանքերը կենտրոնացվեն ԴԱԻՇ-ի ջախջախման վրա», հաղորդել է ՏԱՍՍ-ը: