Ադրբեջանն ընդլայնում է ԼՂՀ այցելողների զավեշտալի «սև ցուցակը»

Ադրբեջանը շարունակում է ընդլայնել «առանց Բաքվի թույլտվության» Լեռնային Ղարաբաղի Հանրապետություն այցելող անձանց համար հատուկ մշակած «սև ցուցակը»՝ այս անգամ ԼՂՀ այցելած Բելգիայի պատգամավորների հաշվին:

Ինչպես հաղորդում է «Արմենպրես»-ը, Ադրբեջանի արտգործնախարարության պաշտոնական ներկայացուցիչ Հիքմեթ Հաջիևը «Թրենդ»-ին հայտնել է, որ պատրաստվում են Բելգիայի գործադիր և օրենսդիր մարմիններ բողոք ուղարկել Բելգիայի Ֆլամանդիայի շրջանի օրենսդիր մարմնի մի խումբ պատգամավորների ԼՂՀ այցելության առնչությամբ, որը կազմակերպել է «Հանուն արդարության և ժողովրդավարության եվրոպացի հայերի ֆեդերացայի» կողմից: Հաջիևը հայտնել է, որ բելգիացի պատգամավորները կմտցվեն Ադրբեջանի ԱԳՆ համար «անցանկալի անձանց» «սև ցուցակ», որը ստեղծվել է 2013 թվականին:

Articolo21.org կայքն ավելի վաղ հայտնել է, որ Բաքվի իշխանությունների անցանկալի անձանց «սև ցուցակում» ընդգրկված են ամբողջ աշխարհի տարբեր երկրներից 532 անձանց անուններ: Դրանց մեջ են հայտնի քաղաքական և հասարակական գործիչներ, թատերական կոլեկտիվներ, գրողներ, լրագրողներ, 20 իտալացի, աշխարհառհչակ երգչուհիներ Կազարնովսկայան, Կաբալյեն: Նրանք բոլորը Բաքվի այդ զավեշտալի ցուցակում հայտնվել են միայն այն պատճառով, որ «մեղավոր» են իրենց գործունեության հետ կապված ԼՂՀ այցելության մեջ:

Այդ ցուցակից ԼՂՀ այցելող յուրաքանչյուր ոք հայտարարել է, որ մեղմ ասած' թքած ունի այդ «սև ցուցակի» վրա, քանի որ այն հանդիսանում է անմիջական հարձակում իր և կարծիք արտահայտելու ազատության վրա: