Մոսկվան «կջերմացնի» Անկարայի հետ հարաբերությունները Սու-24-ը խոցելու պատասխանատվությունը ընդունելու դեպքում

Ռուսաստանը պատրաստ է «ջերմացնել» Թուրքիայի հետ հարաբերությունները այն պայմանով, որ Թուրքիան կընդունի ռուսական Սու-24 օդանավը խոցելու պատասխանատվությունը։ Այս մասին հայտնել է ՌԴ Դաշնության խորհրդի խոսնակ Վալենտինա Մատվիենկոն, տեղեկացնում է «ՌԻԱ Նովոստին»-ն։

«Ռուս-թուրքական հարաբերությունները, մեղմ ասած, անմխիթար վիճակում են։ Ինչպես գիտեք, հարաբերությունները սառել են ոչ մեր մեղքով»,- ասել է նա։

Մատվիենկոն նշել է, որ Ռուսաստանը պատրաստ է կարգավորել խնդիրը, եթե Թուրքիայի ղեկավարությունը կընդունի ռուսական Սու-24 օդանավը խոցելու պատասխանատվությունը, սակայն թուրքական կողմը դեռ չի էլ ակնարկում այդ մասին։

Մատվիենկոն նաև ընդգծել է, որ Թուրքիան միակ երկիրն է, որը խոչընդոտում է Ժնևում միջսիրիական բանակցային գործընթացին քրդերի մասնակցությանը։