Հրադադարը չի նշանակում ռազմական գործողությունների ավարտ. Ռազմական փորձագետ

Իրականացրած ռազմական գործողությունները Ադրբեջանի նախագահ Իլհամ Ալիևի փորձն է՝ վերականգնելու իր քաղաքական իմիջը: Եթե նա կրկին ունենա ներքաղաքական խնդիրներ, չի բացառվում, որ կփորձի փրկել իրավիճակը՝ կրկնելով այս սցենարը: Լրագրողների հետ հանդիպման ժամանակ նման կարծիք հայտնեց ռազմական փորձագետ և համակարգող Կարեն Վրթանեսյանը: Նա նաև նշեց, որ հայտարարված հրադադարը չի նշանակում ռազմական գործողությունների ավարտ, իսկ տեղեկատվական պատերազմները երբեք չեն դադարի: «Հրադադարը կարող է նաև նոր ուժեր բերելու և ռազմական գործողությունները վերսկսելու նպատակ հետապնդել»,- «Արմենպրես»-ի փոխանցմամբ՝ ավելացրեց մասնագետը:

Գնահատելով հայկական, ադրբեջական և միջազգային լրատվադաշտը վերջին օրերին՝ Վրթանեսյանն ասաց, որ ադրբեջանական կողմից սոցցանցերում գործում էին ինչպես կեղծ օգտատերեր, այնպես էլ իրական մարդիկ, ովքեր հիմնականում իշխող կուսակցության երիտասարդական թևի ներկայացուցիչներ էին: Այս անգամ հայ հասարակության շրջանում ապատեղեկատվություն տարածելու հարցում նրանք ոչ այնքան ակտիվ գործունեություն ծավալեցին: Առաջին իսկ րոպեներից նրանք փորձում էին համոզել իրենց բնակչությանը, թե ունեն մեծ նվաճումներ, ու թաքցնում էին իրենց կարուստների մասշտաբը: «Ընդհանուր առմամբ, ադրբեջանական ԶԼՄ-ները բնակչության ուղեղների լավ լվացում են արել»,- ի մի բերելով խոսքը՝ ասաց Վրթանեսյանը: Նրա կարծիքով՝ Ադրբեջանի կողմից որոշակի պայմանավորվածություններ կային նաև միջազգային մամուլում՝ իրադարձությունները խեղաթյուրված ներկայացնելու համար, բայց նպատակին նրանք չհասան: «Կան բազմաթիվ օրինակներ, թե ինչպես էին նրանք փորձում ապատեղեկատվություն տարածել գումարի դիմաց, սակայն՝ անօգուտ»,- ընդգծեց ռազմական փորձագետը: Մյուս կողմից՝ CNN-ի ծրագրերից մեկի ընթացքում խոսվեց Ալիևների ընտանիքի օֆշորային ընկերութ յունների մասին, իսկ ԼՂՀ ԱԳ նախարար Կարեն Միրզոյանը և Ադրբեջանի ԱԳ նախարարն Էլմար Մամեդյարովը ներկայացվեցին իբրև իրավահավասար պաշտոնյաներ: Վրթանեսյանն իր խոսքում նշեց, որ հայկական կողմը իրականացրեց արագ և լուրջ մոբիլիզացիա: Թե լրատվամիջոցները, անհատները՝ բլոգերները, սոցցանցերում ակտիվ օգտատերերը, սկսեցին տարբեր ուղղություններով աշխատել:

«Ապրիլի 2-ին մինչև կեսօր ադրբեջանական մեդիան լռում էին, ուստի միջազգային լրատվամիջոցների համար ինֆորմացիայի միակ աղբյուրը հայկական ԶԼՄ-ներն էին»,- իր հերթին նշեց մեդիա փորձագետ Միքայել Յալանուզյանը: Հնարավոր է՝ ադրբեջանական մեդիան սպասում էր հանձնարարությունների, թե ինչպես պետք է ներկայացնել իրավիճակը: «Կարևոր է արձանագրել, որ միջազգային խոշոր լրատվամիջոցները հիմնականում աշխատում էին հավասարաչափ ներկայացնել երկու կողմերի տվյալները, և բավականին ակտիվորեն օգտվում էին նաև ղարաբաղյան լրատվամիջոցների, ՊՆ, ԱԳՆ և նախագահի մամուլի խոսնակի փոխանցած տեղեկատվությունից»,- հավելեց Յալանուզյանը: Այս առումով՝ հայկական կողմի տեսակետը լսելի եղավ շատերի համար: Նրա գնահատմամբ՝ հայկական մեդիայի ճնշող մեծամասնությունը այս օրերին իրադարձությունները լուսաբանել է գիշեր-ցերեկ և շատ օպերատիվ՝ ցուցաբերելով բարձր պրոֆեսիոնալիզմ և ներկայացնելով ճշտված ինֆորմացիա: Մասնագետները նաև հավելեցին, որ ադրբեջանցի հաքերները բազմաթիվ հայկական լրատվական կայքերի վրա հարձակումներ են գործել՝ չբացառելով նաև այն տարբերակը, որ այդ հարցում հակառակորդին օգնել են Թուրքիայից:

Միջազգայնագետ էդգար Էլբակյանը ավելացրեց, որ Ադրբեջանի թույլ կողմն այն է, որ ինֆորմացիայի միակ աղբյուրը պետական լրատվամիջոցներն են, նրանք չունեն այլընտրանք: Ըստ նրա՝ հայկական տեղեկատվական դաշտը կեղծ օգտատերերով լցված չէ, իսկ հայ միջին վիճակագրական օգտատատերը ադրբեջանականից ավելի գրագետ է: Միջազգայնագետի գնահատմամբ՝ տեղեկատվական դաշտում կա ինքնակազմակերպում. մենք ավելի զգոն ենք դարձել ապատեղեկատվություն տարածելու հարցում: