Կոնգրեսում հայտարարել են՝ Թրամփի դեմ մահափորձերը չափազանց հաճախակի են դարձել

ԱՄՆ նախագահ Դոնալդ Թրամփի դեմ մահափորձերը դառնում են սովորական երևույթ, Fox News-ին ասել է Ներկայացուցիչների պալատի խոսնակ Մայք Ջոնսոնը։

Մեկնաբանելով Սպիտակ տան մոտ վերջերս տեղի ունեցած կրակոցները՝ Ջոնսոնը նշել է, որ նախագահի դեմ արդեն երեք մահափորձ է եղել։ Խոսնակը հիշեցրել է, որ այդ հարձակումներից երկուսի ժամանակ ինքը Թրամփի հետ է եղել։ Ջոնսոնի խոսքով՝ նման միջադեպերը դառնում են չափազանց տարածված։

Խոսնակը նշել է, որ ԱՄՆ նախագահը նման սպառնալիքները համարում է պետության ղեկավարի իր աշխատանքի մի մասը։ Ջոնսոնը ընդգծել է երկրում լարվածության թուլացման անհրաժեշտությունը։ Այս առումով՝ խոսնակը իր դեմոկրատ գործընկերներին կոչ է արել իրենց հակառակորդներին հրեշ չդարձնել՝ նրանց նացիստ անվանելով, և նախագահին ժողովրդավարության համար սպառնալիք չհայտարարել, քանի որ դա միայն գրգռում է «ամեն տեսակի խելագարների»։