Թմրանյութի հայտնաբերման 6 դեպք՝ 2 օրում

Նոյեմբերի 15-ին` ժամը 20.00-ին, ոստիկանության Գյումրիի բաժնի ծառայողները մի կիսաքանդ շինությունից բերման են ենթարկել նախկինում դատապարտվածներ 43-ամյա Հակոբ Բ.-ին և 39-ամյա Էդգար Կ.-ին:

Զննությամբ նշված վայրից հայտնաբերվել են տարբեր տարաներ՝ հեղուկներով և նստվածքի հետքերով, սոդայի տուփ` սպիտակավուն զանգվածով, 4 կտոր չոր սպիրտ և 4 ներարկիչ, որոնցից մեկը՝ շագանակագույն հեղուկով:

Էդգար Կ.-ն հայտնել է, որ ինքը թմրամոլ է, իսկ հայտնաբերվածը դեղորայքից պատրաստված թմրամիջոց է, որը պատրաստել է իր օգտագործման համար:

Նշանակվել է դատաքիմիական փորձաքննություն:

Կատարվում է հետաքննություն:

Նոյեմբերի 15-ին՝ ժամը 12.40-ի սահմաններում, ոստիկանության ծառայողները Վերին Չարբախի 3-րդ փողոցի տներից մեկի խոհանոցում հայտնաբերել են 2 տարա՝ դեղնականաչավուն հեղուկով, ապակյա փոքր տարա՝ մուգ շագանակագույն նստվածքով, օգտագործված ներարկիչներ՝ նստվածքի հետքերով, ներարկիչի 1 ասեղ և տարբեր դեղամիջոցների դատարկ տուփեր:

Նշված տնից ոստիկանության Չարբախի բաժանմունք բերման են ենթարկվել 3 տղամարդ, ովքեր հայտարարել են, որ թմրամիջոցը պատրաստել են իրենց օգտագործման համար:

Նշանակվել է դատաքիմիական փորձաքննություն:

Նոյեմբերի 16-ին՝ ժամը 10.30-ին, ոստիկանության Արտաշատի բաժնի ծառայողները Դմիտրով գյուղի բնակիչներից մեկի տանը կից հողամասի հավաբնից 40 լիտրանոց տարայի մեջ հայտնաբերել են 270 գ կանեփանման զանգված, իսկ նապաստակների բնից՝ ևս մեկ տարա՝ 26,5 գ կանեփանման զանգվածով:

Հայտնաբերվածն ուղարկվել է փորձաքննության:

Նոյեմբերի 16-ին՝ ժամը 16.30-ին, ոստիկանության Գյումրիի բաժնի ծառայողները, թմրամիջոց պատրաստելու և պահելու կասկածանքով, Գյումրիի Օզանյան փողոցից բերման են ենթարկել Գյումրիի բնակիչ, նախկինում դատապարտված 54-ամյա մի տղամարդու:

Խուզարկությամբ նրա գրպանից հայտնաբերվել է ներարկիչ՝ դեղնավուն հեղուկով:

Բերման ենթարկվածը հայտնել է, որ ինքը թմրամոլ է, իսկ հայտնաբերվածը դեղամիջոցից պատրաստված թմրանյութ է:

Նշանակվել է դատաքիմիական փորձաքննություն:

Կատարվում է հետաքննություն:

Նոյեմբերի 16-ին՝ ժամը 18.00-ին, ոստիկանության Էրեբունու բաժնի ծառայողները, թմրամիջոց պահելու և իրացնելու կասկածանքով, Տիգրան Մեծի պողոտայից բերման են ենթարկել 29-ամյա մի երիտասարդի, որի բաճկոնի գրպանից հայտնաբերվել է թղթե 9 փաթեթ, որոնցում առկա էր կանաչ գույնի կանեփանման զանգված:

Հայտնաբերվածն ուղարկվել է փորձաքննության:

Նոյեմբերի 15-ին՝ ժամը 23.35-ին, ոստիկանության ծառայողները, ապօրինի թմրամիջոց ձեռք բերելու, պահելու և իրացնելու կասկածանքով, բերման են ենթարկել 30-ամյա Հայկ Հ.-ին, 23-ամյա Ալվարդ Հ.-ին, 33-ամյա Վանուշ Թ.-ին և 24-ամյա Աննա Ք.-ին:

Աննա Ք.-ի պայուսակում հայտնաբերվել է մարիխուանա թմրամիջոցի նմանվող 2 գ դեղնականաչավուն զանգված, Ալվարդ Հ.-ի պայուսակում՝ նույն թմրամիջոցին նմանվող 0,2 գ զանգված, իսկ Վանուշ Թ.-ի բաճկոնի գրպանում՝ 0,3 գ հաշիշանման զանգված:

Ըստ Աննա Ք.-ի հայտարարության՝ իր մոտ հայտնաբերված զանգվածը մարիխուանա թմրամիջոց է, որը ձեռք է բերել Ալվարդ Հ.-ից: Ալվարդ Հ.-ն հայտարարել է, որ իր մոտ եղած դեղնականաչավուն զանգվածը մարիխուանա թմրամիջոց է, որը ձեռք է բերել Հայկ Հ.-ից, իսկ Վանուշ Թ.-ն էլ հայտնել է, որ իր մոտ հայտնաբերված դեղնականաչավուն զանգվածը հաշիշ է, որը ձեռք է բերել և Հայաստան ներկրել ՌԴ-ից: 

Հայտնաբերված զանգվածներն ուղարկվել են փորձաքննության: