ԱՄՆ-ում օդանավը ընկել է շենքի վրա․ երկու մարդ զոհվել է

Նյու Ջերսի նահանգի Տետերբորո օդանավակայանում վայրէջք կատարելիս կործանվել է Learjet 35 ռեակտիվ ուղեւորատար օդանավը, երկու մարդ է զոհվել, հայտնում է Americaru կայքը։

Քաղավիացիայի դաշնային վարչության հայտարարության մեջ ասվում է՝ օդանավը դուրս է եկել Ֆիլադելֆիայի միջազգային օդանավակայանից ու մոտենում էր թռիչքուղուն, երբ բախվել է պահեստի շենքին , որը օդանավակայանից 400 մ հեռավորության վրա էր գտնվում։ Քարլշտադտի ոստիկանությունը հայտնել է, որ օդանավում ուղեւորներ չեն եղել։ Դեռ հայտնի չէ, ցամաքում մարդ տուժել է, թե ոչ։

Ինչպես տեղեկանում ենք՝ վթարի վայրում մի քանի մեքենա է հրկիզվել։ Կրակը տարածվել է առնվազն մեկ շենքի վրա։ Վթարի պատճառը հետաքննում են։ Ականատեսների խոսքով օդանավը տարօրինակ անկյան տակ էր վայրէջք կատարում։