Աշխարհահռչակ Moody's-ն՝ ընդդեմ Ադրբեջանի

Moody's Investors Service-ը Ադրբեջանի առանց այն էլ բացասական B1 ներդրումային վարկանիշը ցանկանում է ավելի իջեցնել:

Այս մասին, հայտնում է ադրբեջանական marja.az-ը՝ հղում կատարելով Moody's-ին :

Հայտարարության մեջ ասվում է, որ Ադրբեջանի վարկանիշը բացասական B1-է նախորդ տարվա ապրիլի 29-ից:

Marja.az-ի փոխանցմամբ` Ադրբեջանի ներդրումային վարկանիշի իջնելու պատճառը այն է, որ պետությունը Միջազգային բանկի պարտքերը վերցրել է իր վրա:

Moody's-ի հաղորդմամբ` Ադրբեջանի այս քայլը կհանգեցնի հսկայական պետական ծախսերի առաջացման, երկրի ֆինանսական վիճակի վատթարացման, ինչպես նաև կուշացնի Ադրբեջանի տնտեսական զարգացումը:

«Եթե Ադրբեջանի վարկային վարկանիշը միքիչ էլ անկում ապրի, դա կհանգեցնի Ադրբեջանում կատարվող ներդրումների նվազեցման և պետության համար ստացվող վարկերի տոկոսադրույքների աճին»,- նշված է կազմակերպության հայտարարության մեջ:

Հայտարարության մեջ նշվում է նաև, որ ստեղծված անբարենպաստ վիճակը կազդի Ադրբեջանի ազգային արժույթի` մանաթի վրա ևս:

Ստեղծված իրավիճակը մեծ հարված կհասցնի նաև Ադրբեջանի ավանդատուներին:

Moody's գործակալության կանխատեսմամբ` Ադրբեջանի կառավարությունը Միջազգային բանկին կհատկացնի հավելյալ միջոցներ բանկի կապիտալը մեծացնելու համար:

Միջազգային բանկի 3,3 մլրդ դոլար արտաքին պարտքը իր վրա վերցնելով և բանկի կապիտալի բարձրացման համար միջոցներ տրամադրելով՝ Ադրբեջանը կարող է լուրջ հարված հասցնել երկրի ֆինանսական միջոցներին:

Միջազգային բանկի սննկացումը և արտաքին պարտքը պետության վրա թողնելը վերացնում է այլ բանկերի համար նախատեսված ֆինանսական միջոցները, և եթե այլ բանկերում էլ իրավիճակը վատանա, դժվար կլինի փրկել այդ բանկերը:

«Ադրբեջանը պետական բյուջեի միջոցների մի մասը ուղղելով Միջազգային բանկի պարտքերին, կարող է հանգեցնել նաև պետական ներդրումների նվազեցմանը, ինչի արդյունքում կհետաձգվի Արբեջանի տնտեսական զարգացումը:

Ադրբեջանցի տնտեսագետ-փորձագետ Սամիր Ալիևի խոսքով՝ Նյու Յորքի դատարանի վճռը շատ կարևոր է Ադրբեջանի համար:

Փորձագետը նշել է, որ եթե Նյու Յորքի դատարանը որոշում կայացնի, որ Ադրբեջանի կառավարությունը պետք է Միջազգային բանկից իրեն փոխանցված արտաքին պարտքը վճարի կարճ ժամկետում, դա մեծ հարված կլինի Ադրբեջանի տնտեսությանը :

«Այս ամենը մեծ հարված կլինի երկրի բյուջեի ծախսերի, և մանաթի փոխարժեքի տեսանկյունից մեծ խնդրիներ կստեղծի»,- ասել է փորձագետը:

Սամիր Ալիևը, սակայն, վստահորեն նշել է, որ Moody's-ի հայտարարությունը Ադրբեջանում կատարվելիք ներդրումների առումով կարող է մեծ խնդիրներ առաջացնել:

«Այս հայտարարությունից հետո Ադրբեջանը կարող է ներդրումների համար անցանկալի միջավայր դառնալ»,- եզրափակել է նա:

Արմենպրեսը հայտնել էր, որ «Ադրբեջանի միջազգային բանկը»-ը, որը հանդիսանում է այդ երկրի խոշորագույն դրամատունը, երկրում առաջացած արտարժույթային դեֆիցիտի պատճառով հայտնվելով փլուզման եզրին, չի կարողանում վճարել արտաքին պարտքը, և սկսել է պարտատերերի հետ բանակցություններ վարել պարտքերի վերաձևակերպման շուրջ:

Բանկը մայիսի 10-ին պաշտոնապես հայտարարել է, որ պարտատերերի համաձայնության դեպքում արտարժույթով արտաքին պարտքը փոխարինվելու է երկրի սուվերեն պարտատոմսերով: