Վենեսուելայում աճում է բողոքի ակցիաների ընթացքում զոհվածների ու տուժածների թիվը

Վենեսուելայի նախագահ Նիկոլաս Մադուրոն հակակառավարական ակցիաների մասնակիցներին մեղադրել է Կարակասում իշխանությունների կողմնակիցներից մեկին հրկիզելու մեջ: Իսկ երկրի արեւմուտքում բողոքի ակցիայի ընթացքում գնդակահարվել է ընդդիմադիր մի ակտիվիստ: Այսպիսով, Վենեսուելայում բողոքների ներկայիս ալիքի ընթացքում սպանվածների թիվը հասել է 48-ի, տեղեկացնում է BBC-ն:

Ինչպես նշվում է, Կարակասում հակակառավանրական ցույցի ընթացքում 21-ամյա Օռլանդո Խոսեին հրկիզել են՝ նրան կասկածելով գողության մեջ: Նա փրկվել է, բայց մարմնի 80 տոկոսի այրվածքներ է ստացել: Բացի այդ, նրա մարմնի վրա դանակով հասցված վերքեր են գտել: Ելույթ ունենալով ազգային հեռուստատեսությամբ՝ նախագահ Մադուրոն հայտարարել է, թե երիտասարդի վրա հարձակվել են սոսկ այն բանի համար, որ նա իրեն հայտարարել է հանգուցյալ նախագահ Ուգո Չավեսի կողմից ստեղծված շարժման անդամ:

Մինչդեռ Վենեսուելայի գլխավոր դատախազը հայտնել է, որ Վալերա քաղաքում անհայտ անձինք կրակ են բացել հակակառավարական ցույցի մասնակիցների վրա՝ վիրավորելով մի քանի մարդու: Նրանցից մեկը՝ Էդի Ալեխանդրո Տերան Ագուիլարը, մահացել է:
Ընդամենն այդ քաղաքում ցույցերի ընթացքում մեկ օրում տուժել է 46 մարդ:
Վենեսուելայում ապրիլի սկզբից բողոքի զանգվածային ակցիաներ են սկսվել այն բանից հետո, երբ Գերագույն դատարանը որոշեց լրջորեն սահմանափակել ընդդիմադիր Ազգային ժողովի իշխանությունը: Որոշումը չեղյալ է հայտարարվել, բայց ընդդիմության կողմնակիցները փողոցներ են դուրս եկել պահանջելով դատարանի անդամների պաշտոնաթողությունը եւ վաղաժամկետ ընտրությունների անցկացում: Այժմ նրանք բողոքում են նաեւ Սահմանադիր ժողովի գումարման դեմ՝ այն համարելով սահմանադրությունը փոխելու փորձ:

Լուսանկարը` AFP