Մշակույթի նախարարությունն ինքնաբացարկ հայտնեց

Երգիչ և երաժիշտ Վահան Արծրունու բնորոշմամբ՝ Մշակույթի փոխնախարարի՝ ««Խավարում» ցուցահանդեսը քաղաքականացված է» արտահայտությունն արդեն իսկ նշանակում է գրաքննություն. Սա նշանակում է կոպիտ ցենզուրա, կեպիտ ներխուժում արվեստի դաշտ. «Հայաստանում կա ռուսական թանգարան, որը քաղաքականացված է, Աբովյանում կա հայ-ռուսական հսկայական թանգարան, որն արդեն իսկ քաղաքականացված է և, հետևաբար, չի կարող քաղաքանացված որակելով՝ ցուցահանդես փակվել»:

Վահան Արծրունին կատարյալ որակեց «Խավարում» ցուցահանդեսը՝ նշելով, որ Թումանյանի թանգարանի մուտքից բարձրացող աստիճանների վրա շատ պարզ և ճշգրիտ էր ներկայացվել բոլշևիկների կողմից գնդակահարված հայորդիների մասին ողջ տեղեկատվությունը. «Նման ցուցահանդես աշխարհի շատ քիչ երկրներում կարելի է տեսնել, քանի որ գաղափարը շատ ճիշտ էր, նախարարության անհեթեթ պատճառաբանությունները փաստում են, որ ցուցահանդեսը փակելու հրահանգը նախարարությունից ավելի բարձր ատյանից է եղել»:

Վահան Արծրունին հարց բարձրացրեց՝ Մշակույթի նախարարությունը, որը գլենդելյան ճաշարաններում 6-8 երգող արտիստներին վաստակավորի  կոչումներ է շնորհում, արդյո՞ք ունի բարոյական իրավունք՝ միջամտելու նման կարևոր և գաղափարական միջոցառմանը: «Այս լրջագույն հարթությունների վրա Մշակույթի նախարարությունը գոյություն չունի և նման անիմաստ պատճառաբանություններ տարածելով՝ ինքնաբացարկ հայտնեց»:

ԼՈւՐԵՐ.com-ը կոմպոզիտորից հետաքրքրվեց՝ արդյո՞ք սա հերթական սկանդալը չի կարելի համարել՝ կապված Արմեն Ամիրյանի հետ, և ի՞նչ քայլերի կարող է դիմել հասարակությունը. «Հասարակության բուռն բացասական արձագանքը սա փաստեց, և մենք հիմա պահանջում ենք վերաբացել «Խավարում» ցուցահանդեսն այնպես, ինչպես ի սկզբանե եղել է: Արմեն Ամիրյանին փոխելով՝ հարցը չի լուծվի: Ակնհայտ է, որ Հասմիկ Պողոսյանի թիմի և նոր ղեկավար Արմեն Ամիրյանի միջև աշխատանքային հակասություններ կան: Խնդիրն այստեղ համակարգային է: Սակայն ցուցահանդեսի վերաբացման պահանջը պետք է հասարակությունը շարունակի»,-ասաց Վահան Արծրունին:

Աղավնի Սուքիասյան