Հայաստան–ԵՄ համաձայնագիրը չի հրապարակվի մինչեւ ստորագրման պահը. Սվիտալսկի

Ուրախ եմ, որ մոտենում է ՀՀ-ԵՄ համագործակցության համաձայնագիրի ստորագրման պահը։ Այս մասին այսօր կայացած ասուլիսի ժամանակ ասաց ՀՀ-ում ԵՄ պատվիրակության ղեկավար, դեսպան Պյոտր Սվիտալսկին:

Նա հավելեց՝ տեքստը չի հրապարակվում և դա սովորական աշխատակարգ է և նշեց որոշ պատճառներ․ «Առաջին հերթին՝ համաձայնագիրը նախագիծ է համարվում, քանի դեռ այն ստորագրված չէ։ Այն նախագիծ է համարվում անգամ, երբ նախաստորագրված է։ Երկրորդ պատճառն այն է, որ ընթանում է դիվանագիտական գործընթաց, որը պետք է գաղտնի մնա»,– նշեց Սվիտալսկին։

Դեսպանը կոչ արեց լինել համբերատար․ «Ովքեր անհամբեր են, խորհուրդ կտամ ծանոթանալ նմանատիպ այլ համաձայնագրերի բովանդակությանը։ Իհարկե, դրանց բովանդակությունը տարբերվում է, բայց մեծ մասը նման է։ Մենք ասել ենք, որ փաստաթուղթը, մասնավորապես դրա տնտեսական մասը, տարբերվելու է Ասոցացման մասին համաձայնագրից։ Դա ստանդարտ դիվանագիտական կարգ է։ Մենք պետք է փաստաթուղթը պահենք մեր սեղաններին եւ դարակներին մոտ, քանի դեռ այն չի ստորագրվել»,– ասաց Պյոտր Սվիտալսկին։