Կկիրառվի՞ ՍԴ որոշումը, թե՞…

Այսօր «Հայացք» ակումբում տեղի ունեցած ասուլիսի հյուրը Սահմանադրական դատարանի իրավախորհրդատվական վարչության պետ Լիանա Հակոբյանն էր, ով խոսեց ՀՀ քաղաքացիական օրենսգրքի 1087.1 հոդվածի՝ սահմանադրությանը համապատասխանելու վերաբերյալ Սահմանադրական դատարանի որոշման թեմայի շուրջ։

Հակոբյանը հայտարարեց, որ չպետք է քննարկել Սահմանադրական դատարանի որոշումներն, այլ կատարել դրանք՝ անվերապահորեն։ 

«Որքան կարողացել եմ հետևել Սահմանադրական դատարանի որոշման ընդունմանը հետևող հրապարակումներին, դրանք այսպիսին են եղել հիմնականում՝ «Սահմանադրական դատարանը Քաղաքացիական օրենսգրքի դիտարկվող դրույթը ճանաչեց սահմանադրական». ասեմ, որ դա ոչ թե այդպես է, այլ խնդրո առարկա նորմերը համապատասխանում են սահմանադրությանը՝ միայն Սահմանադրական դատարանի իրավական դիրքորոշումներից բխող բովանդակության շրջանակներում»,– պարզաբանեց Հակոբյանը։

Նա նաև ասաց, որ Սահմանադրական դատարանի ընդունած որոշումներն առավելություն ունեն, իրավաբանական ուժ՝ օրենքների նկատմամբ։ Նրա պնդմամբ թյուր է այն կարծիքը, թե Սահմանադրական դատարանի որոշումները կկիրառվեն դատավորների կողմից ու հերթական իրավախախտումը չի արձանագրվի։ Լիանա Հակոբյանը համոզված է, որ Սահմանադրական դատարանի որոշումները չեն կարող կյանքի չկոչվել։ Իսկ անարդար վճռի դեպքում մարդու իրավունքների եվրոպական դատարանը հաստատ կընդունի ճիշտ որոշում։