Վարդան Հարությունյան. «Ամեն ինչ պետք է լինի տրամաբանության շրջանակներում»

Այսօր կայացած ասուլիսին «Իրավունքի և ազատության կենտրոն» հ/կ-ի նախագահ Վարդան Հարությունյանը «թիկնազորի օրենքի» վերաբերյալ նշեց, որ Հայաստանում մարդիկ շրջում են թիկնազորով, ոչ թե իրենց անվտանգությունից ելնելով, այլ իրենց կարողությունները և հնարավորությունները ցուցադրելու համար:

«Նրանք նույնիսկ դեղատուն չեն գնում իրենց երեխայի համար դեղ գնելու, փոխարենն ուղարկում են իրենց վարորդին կամ թիկնապահին։ Մեկ ուրիշից ավելի շատ թիկնապահ ունենալու մոլուցքը ռաբիսության դաշտից է»,- ընդգծեց բանախոսը։

Ասուլիսին, անդրադառնալով նաև խոսքի ազատությանը և դրա հետ կապված ՍԴ–ի որոշմանը, Վարդան Հարությունյանն ասաց. «Օրենքի նախագիծը ողջունելի էր, բայց որ դա ուղղված էր լինելու մամուլի դեմ` ակնհայտ էր։ Այդ ամենը պատահական չէր այն. լավ պատկերացված ու մշակված էր, և որևիցե մեկը չի կարող ասել, թե ինքը չէր կարող մտածել, որ կլինի հենց այդպես։ Այսպիսի խոշոր ֆինանսական տույժեր չպետք է ներկայացված լինեն ՀՀ–ում օրենսդրությամբ, որովհետև Հայաստանում չկան պտտվող այդ գումարները։ Կարծում եմ՝ ամեն ինչ պետք է լինի տրամաբանության շրջանակներում»։