Հանցավոր խումբը դատապարտվել է՝ անօրինական ճանապարհով մեծ չափերի գումար յուրացնելու համար

Դատարանը հիմնավոր է համարել հանցավոր ճանապարհով ստացված եկամուտներն օրինականացնելու, խարդախության, յուրացում կատարելու, կազմակերպության ծառայողի կողմից լիազորությունները չարաշահելու համար մեղադրող դատախազի կողմից թվով 8 անձանց ներկայացված մեղադրանքները եւ դատապարտել ազատազրկման:

Դատարանը, ստուգելով քրեական գործի հիմքում դրված ապացույցների ձեռքբերման աղբյուրները, յուրաքանչյուր ապացույց գնահատելով թույլատրելիության, իսկ ամբողջ ապացույցները` իրենց համակցությամբ, պարզել է, որ «ՎՏԲ –Հայաստան բանկ» ՓԲ ընկերության Սեւանի մասնաճյուղի թվով 6 աշխատակիցներ մեղավոր են 2007-2009թթ. ընթացքում առանց պատշաճ կարգով վարկային գործեր կազմելու այլ անձանց անունով կեղծ վարկեր ձեւակերպելու մեջ: 
Նախաքննությամբ պարզվել է, որ Կ. Ղասաբօղլյանը,  2005թ. մինչեւ 2008թ. օգոստոսն ընկած ժամանակահատվածում աշխատելով «ՎՏԲ –Հայաստան բանկ» ՓԲ ընկերության Սեւանի մասնաճյուղում` որպես մասնաճյուղի ակտիվային գործառույթների խմբի տնտեսագետ եւ վարկային պատասխանատու, բանկի վարկառուների վստահությունը չարաշահելու եւ կեղծ վարկային գործեր կազմելու եղանակով հափշտակել է առանձնապես խոշոր չափերի` 44 215 000 դրամ գումար: 
Ապա կեղծ փաստաթղթեր օգտագործելով` Կ. Ղասաբօղլյանը կենցաղային տեխնիկայի ձեռք բերման կեղծ վարկեր է ձեւակերպել տարբեր քաղաքացիների անվամբ, գումարը փոխանցել կենցաղային տեխնիկայի առեւտրով զբաղվող «Աստղիկ» ՍՊ ընկերության հաշվեհամարին, ապա փաստաթղթերով ցույց տվել` իբր վարկառուներն ստացել են կենցաղային տեխնիկան, իսկ փոխանցված գումարը` 10 488 439,7 դրամ, կանխիկացրել: 
Իր հերթին Ա. Թովմասյանը, ով աշխատել է ՀՀ արդարադատության նախարարության ԴԱՀԿ ծառայության Գեղարքունիքի ստորաբաժանմունքում եւ մինչեւ 2009թ. մայիսը համատեղության կարգով` նաեւ «Աստղիկ» ՍՊ ընկերությունում` որպես վաճառող, հանցավոր համաձայնության գալով  Կ. Ղասաբօղլյանի եւ նույն ՍՊ ընկերության տնօրեն Ռ. Խաչատրյանի հետ (մահացել է) պատրաստել է կեղծ տեղեկանքներ: Այդ տեղեկանքների օգտագործմամբ մի շարք քաղաքացիների անվամբ կենցաղային տեխնիկայի ձեռքբերման վարկեր են ձեւակերպել, որով Ա. Թովմասյանն օրինականացրել է 5 416 398 դրամ գումար:
«ՎՏԲ –Հայաստան բանկ» ՓԲ ընկերության նույն մասնաճյուղի գլխավոր հաշվապահ Ն. Նավասարդյանը օժանդակել է Կ. Ղասաբօղլյանին «Աստղիկ» ՍՊ ընկերության հաշվեհամարին մի շարք քաղաքացիների անվամբ փոխանցելու եւ յուրացնելու կեղծ, առանց համապատասխան վարկային գործերի ձեւակերպած եւ համակարգիչ մուտքագրված վարկերից ստացված առանձնապես խոշոր չափերի գումարները:
«ՎՏԲ –Հայաստան բանկ» ՓԲ ընկերության Սեւանի մասնաճյուղի սպասարկման բաժնի վարիչ Ս. Ասատրյանը, մասնաճյուղի կառավարչի տեղակալ Ա. Մկրտչյանը եւ սպասարկման բաժնի ավագ մասնագետ, գանձապահ Վ. Ասատրյանը մոտ մեկ տասնյակից ավել քաղաքացիների անվամբ ձեւակերպված վարկերի գումարները գլխավոր հաշվապահ Ն. Նավասարդյանի օժանդակությամբ բաց են թողել նույն մասնաճյուղի վարկային պատասխանատու Կ. Ղասաբօղլյանին` օժանդակելով վերջինիս յուրացնել բանկին պատկանող գումարները:
Բացի այդ, քաղաքացի Պ. Մանուկյանը, չարաշահելով իր հարեւանուհու վստահությունը, վերցրել է վերջինիս անձնագիրը եւ առանց նրա համաձայնության`  նրա անվամբ «ՎՏԲ –Հայաստան բանկ» ՓԲ ընկերության Սեւանի մասնաճյուղում կենցաղային տեխնիկայի ձեռքբերման վարկ է ձեւակերպել եւ սահամանված կարգով վարկի մարումը չկատարելով` հափշտակել այդ գումարը:
Սույն քրեական գործով ամբաստանյալներից 2-ը դատապարտվել են` հանցավոր ճանապարհով ստացված եկամուտներն օրինականացնելու համար, 4-ը` յուրացում կատարելուն օժանդակելու եւ 1-ը` խարդախության համար:
Գեղարքունիքի մարզի ընդհանուր իրավասության դատարանը 2011թ. հոկտեմբերի 11-ի դատավճռով բոլոր ամբաստանյալներին նշանակել է պատիժներ`  ազատազրկման ձեւով: Ըստ այդմ.
 Կ. Ղասաբօղլյանը հանցավոր է ճանաչվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 3-րդ մասի 1-ին կետով եւ 190-րդ հոդվածի 3-րդ մասի 1-ին կետով եւ դատապարտել ազատազրկման 12 տարի ժամկետով` հանցավոր ճանապարհով ստացված գույքի` 10 488 439,7 դրամի բռնագրավմամբ,
Ա. Թովմասյանը հանցավոր է ճանաչվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, 179-րդ հոդվածի 3-րդ մասի 1-ին կետով եւ 190-րդ հոդվածի 2-րդ մասի 1-ին եւ 2-րդ կետերով եւ դատապարտվել ազատազրկման 5 տարի 6 ամիս ժամկետով` հանցավոր ճանապարհով ստացված գույքի` 5 416 398 դրամի բռնագրավմամբ,
Ա. Առաքելյանը հանցավոր է ճանաչվել ՀՀ քրեական օրենսգրքի 214-րդ հոդվածի 2-րդ  մասով եւ դատապարտվել ազատազրկման 3 տարի 6 ամիս ժամկետով,
Ն. Նավասարդյանը, Ս. Ասատրյանը, Ա. Մկրտչյանը եւ Վ. Ասատրյանը հանցավոր են ճանաչվել ՀՀ քրեական օրենսգրքի 38-179-րդ հոդվածի 2-րդ մասի 3-րդ կետով եւ դատապարտվել ազատազրկման 3 տարի ժամկետով, իսկ Պ. Մանուկյանը  հանցավոր է ճանաչվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով եւ յուրաքնչյուրը դատապարտվել ազատազրկման 3 տարի ժամկետով: Նրանց նկատմամբ  կիրառվել է «Համաներում հայտարարելու մասին» ՀՀ  ԱԺ` 2009թ. հունիսի 19-ի որոշման 1-ին կետի 1-ին ենթակետը եւ նրանք ազատվել են պատժի կրումից: 
Դատարանը միաժամանակ բավարարել է «ՎՏԲ –Հայաստան բանկ» ՓԲ ընկերության հայցը` պատճառված վնասը վերականգնելու առումով:
Ա. Թովմասյանը եւ Ա. Առաքելյանը վերաքննիչ բողոք են ներկայացրել ՀՀ վերաքննիչ քրեական դատարան` Գեղարքունի մարզի ընդհանուր իրավասության դատարանի դատավճիռը վերանայելու համար: