Տարաձայնություն չկա, կա թյուրըմբռնում

«Պավլիկ Մանուկյանը մեզ հարազատ ընկեր է, և մենք երբեք չենք պատկերացրել նման քայլեր մեզ հակառակ: Այնուամենայնիվ, մեր մեջ ոչ մի տարաձայնություն չկա, կա պարզապես որոշակի թյուրըմբռնում միմյանց նկատմամբ»,- LՈւՐԵՐ.com-ի հետ զրույցում «Սասնա Ծռեր» կուսակցության  նախաձեռնող խմբի անդամ Սյուզան Սիմոնյանն այսպես մեկնաբանեց այն լուրերը, թե «Ծռերի» ներսում լուրջ պառակտում է սկսվել Պավլիկ Մանուկյանի վերջին հայտարարություններից հետո:

Սիմոնյանի խոսքով՝ հնարավոր է, որ Մանուկյանը նման հայտարարություններով է հանդես գալիս, քանի որ մտահոգ է Արմեն Բիլյանի համար: Միևնույն ժամանակ, հավելում է, որ իրենք ավելի մտահոգ են այս հարցում և ջանքեր են թափում նրան ազատության մեջ տեսնելու համար:

«Չգիտեմ, և չունենք լծակներ իմանալու, թե ինչն է նման արտահայտությանների պատճառը, գուցե նա դուրս գա և այլ հայտարարություննե՞ր անի: Շատ հնարավոր է՝ ազդում են նրա վրա»,-ասաց Սյուզան Սիմոնյանը:

Ինչ վերաբերում է Մանուկյանի այն հայտարարությանը, թե կուսակցության ստեղծումից հետո կարող են որոշակի խոչընդոտներ առաջանալ, Սիմոնյանն ասաց. «Այդ ամենը բանտում գտնվող մի մարդու խոսքեր են, ով, հավանաբար, լավ չի պատկերացնում իրավիճակը:

Իսկ Պավել Մանուկանի՝ «Սասնա Ծռեր» կուսակցությանը հետագա անդամակցության մասին Սյուզան Սիմոնյանն ասաց. «Եթե կցանկանա, ապա ոչ մի խնդիր, իսկ եթե կլինի մեկը, որը չի ցանկանա անդամակցել, ապա մենք ոչ մի խնդիր չենք տեսնում և չպետք է այդ որոշումից հետո մյուսները խաչ քաշեն նրա կատարած սխրագործությունների և հերոսությունների վրա»:

«Հանուն Հայաստան պետության» ճակատի անդամ Ալեք Ենիգոմշյանը եւս մեզ հետ զրույցում նշեց, որ «Ծռերի» ներսում չկա ոչ մի տարաձայնություն, առավել ևս՝ Պավլիկ Մանուկյանի կատարած հայտարարություններից հետո. «Ծռերի ներսում այդպիսի երևույթ չկա: Մենք շարունակում ենք մեկ բռունցք մնալ: Իհարկե, վերջին մեկուկես ամսում որոշակիորեն դեպքերը զարգանում են, բայց դա ոչինչ չի նշանակում»,-ասաց  Ենիգոմշյանը:

Նշենք, որ օրերս «Սասնա Ծռեր» խմբի անդամ Պավել Մանուկյանը կրկին հանդես էր եկել հայտարարությամբ, որում խիստ քննադատել էր Գարեգին Չուգասզյանին.

«Ես մի հայտարարություն պիտի անեմ, որ «Սասնա Ծռերի» իմ ընկերները, իմ «Սասնա ծուռ» ախպրտինքը պետք է շատ զգույշ լինեն, քանզի Հիմնադիր խորհրդարանի համակարգող խորհուրդը պետք է նախ մի հատ հաշվետվություն տա Գարեգին Չուգասզյանի կատարած գործողությունների մասին։ Ինչպե՞ս եղավ, որ նա, երբ մենք ՊՊԾ գնդում էինք, Վարուժան Ավետիսյանը նրան զանգեց, նա պատասխանեց, որ հաջողության դեպքում ես կամ, իսկ անհաջողության դեպքում իմ անունը մոռացեք։ Ինչպե՞ս եղավ, որ նա թաքնվեց եւ ապրիլի 24-ին հայտնվեց, կամ երբ որ Արարատ Միրզոյանի եւ Լենա Նազարյանի՝ գիշերով ստորագրությամբ բաց թողնվեց եւ հայտնվեց դատարանի դիմաց՝ «Սասնա ծռերի» աջակիցների եւ հարազատների առաջ, եւ համարեց քաղաքական սաբոտաժ ժողովրդի արդար ցասումը՝ «Սասնա ծռերին» բաց թողնելու կապակցությամբ։ Կամ՝ ինչպե՞ս եղավ, որ նա հայտնվեց Մատենադարանի մոտ, էդ հայտնությունն իրոք հարությո՞ւնն էր Գարեգինի, թե՞ իրոք նա հարյավ ի մեռելոց, չնայած հոգեւոր ու պետական բարձրաստիճան այրերը գնացին եւ տեղում օրհնեցին էդ հարությունը։ Ինչպե՞ս։ Այսինքն՝ սա ես համարում եմ քաղաքական անեքսիա կամ, իմ որակմամբ՝ քաղաքական բուտիլիզմ»,-հայտարարել էր Պավլիկ Մանուկյւանը:

Արմինե Միքայելյան