Ինչպես կարելի է կանխել մահացած անձի փոխարեն քվեարկելը

Հայաստանի Հանրապետության ոստիկանության անձնագրային և վիզաների վարչության պետ Մնացական Բիչախչյանն «Ազատության» ֆեյսբուքյան ասուլիսի ժամանակ նշեց, որ Երևանի ավագանու ընտրություններին իրավունք ունի մասնակցել 853 390 քաղաքացի:

Անդրադառնալով հարցին՝ 2017 թ. 352 մահացած մարդկանց անուններ է եղել ցուցակներում, թիվը հիմա փոխվե՞լ է, թե ոչ, և եթե փոխվել է, ապա պատճառահետևանքային կապերը որո՞նք են՝ Բիչախչյանը պատասխանեց․

«Յուրաքանչյուր ընտրության ժամանակ ոստիկանությունն իր գործառույթների շրջանակներում իրականացնում է ընտրողների ցուցակների ճշգրտման, վարման աշխատանքներ: 2017թ. ընտրությունների ժամանակ 352-ն այն մահացած անձինք են, որոնց մահը գրանցված չէ ՀՀ-ում սահմանված կարգով»: 

Նա վստահեցրեց՝ մահացած անձանց անունները ցուցակներում հայտնվելու դեպքերից խուսափելու համար այս պահին ցուցակների մաքրման և ճշգրտման գործողություններ է իրականացնում ոստիկանությունը: Դրա համար անհրաժեշտ է նաև ընտրողների աջակցությունը, որոնց անունները հրապարակվել է ոստիկանության կայքում և այն  ներբեռնելու օգնությամբ կարող են պարզել՝ կա՞ն կրկնություններ, թե՝ ոչ:

«Կան հասցեներ, որտեղ կան, օրինակ, 100-ից ավելի գրանցված անձինք, օրինակ՝ Քանաքեռ թունելում: Այդ խնդիրը դեռևս մնացել է անլուծելի: Այն տարիներ շարունակ եկած խնդիր է: Եթե տվյալ բնակելի տարածությունը չունի կադաստրային գրանցում, այնտեղ բնակվող անձինք ստիպված գրանցումն իրակնացնում են մեկ հասցեի տակ, որպեսզի իրացվի իրենց իրավունքը»,-ասաց Բիչախչյանը:

Վարչապետին առընթեր ընտրական օրենսդրության բարեփոխումների հանձնաժողովի քարտուղար Դանիել Իոաննիսյանն ավելացրեց․

«Մահացած անձի անունը ցուցակում լինելու դեպքում խնդիր է առաջանում նրա փոխարեն քվեարկելու: Այդ ռիսկը հնարավոր է ծածկել հետևյալ ճանապարհներով՝ էլեկտրոնային գրանցման սարքերով, ցուցակների հրապարակման ժամանակ, երբ ընտրողների ստորագրացուցակները հրապարակվում են, և եթե բացակա կամ մահացած քվեարկության դեպք լինի՝ քաղաքացիները կարող են տեսնել և բարձրաձայնել»:

Իոաննիսյանը նկատեց, որ կարելի է խուսափել ուրիշի փոխարեն քվերակելու դեպքերից՝ ընտրատեղամասերում դիտորդների, լրագրողների առկայության դեպքում, քանի որ մահացած մարդու փոխարեն քվեարկողը կվախենա այդ քայլից: