Կարևոր է, որ այս թուհուբոհին չանտեսենք ընտրողի իրավունքները. Արփինե Հովհաննիսյան

Մի քանի սուբյեկտներին վերաբերող ընտրական գործընթաց ենք անում, և կարևոր է, որ այս թուհուբոհին չանտեսենք ընտրողի իրավունքները. Կառավարության կողմից ներկայացված «ՀՀ քրեական օրենսգրքում փոփոխություններ և լրացումներ կատարելու մասին» և կից ներկայացված օրենքների նախագծի քննարկմանը հայտարարեց ՀՀԿ պատգամավոր Արփինե Հովհաննիսյանը:

Ըստ նրա` տեսակետներ են հնչում, թե այս նախագիծը ռադիկալ քրեականացման նախագիծ է: «Այդքան էլ համաձայն չեմ, քանի որ ընտրակեղծիքները մենք քրեականացրել էինք, ուղղակի միջին ծանությունը հիմա դարձնում են ծանր, և այս համատեքստում նախագծին կողմնակից եմ»,- ասաց նա:

Միաժամանակ նա խոսեց այն մտահոգություններից, որոնք, ըստ նրա՝ գոյություն ունեն նախագծում և շեշտեց, որ իր քվեարկությունը պայմանավորվելու է իր հարցադրումներին պատշաճ լուծում տալուց:

«Առաջինը վերաբերում է ընտրակաշառք վերցնելուն, այն, որ ստանալը քրեորեն պատժելի է, վաղուց կար և նորմալ է, կաշառք ստանալն էլ վաղուց կար, բայց ընտրակաշառք բաժանելու հետ կապված է իմ դիտարկումը՝ «կաշառքի առաջարկը, կամ խոստումն ընդունելը», խնդրելու եմ այս ձևակերպումը հանել քրեական օրենսգրքից»,- ասաց նա և հավելեց, որ խոստումն ընդունելու հետ կապված որևէ մեկն իրավապահ համակարգից չգիտի, թե ինչպես են մեկնաբանելու խոստումն ընդունելը:

«Մեր կարծիքը չի կարևոր, կարևոր է, թե ինչքան հստակ է իրավաբանորեն ձևակերպված և կիրառող մարմինն ի՞նչ է հասկանում դրա տակ»,- ասաց նա:

Երկրորդ դիտարկումը վերաբերում էր խոստման հիման վրա քվեարկության գաղտնիությունը խախտելուն: «Ո՞ւմ է տրված խոստումը, ե՞րբ է տրված, ինչի՞ համար է տրված, որ այդ քաղաքական ուժին է քվեարկելու: Շահադիտական նպատակներովը այսօր էլ կա և վաղուց է քրեականացված, որի տակ մտնում է և՛ գումարը, և՛ այլ խոստումներ»,-ասաց նա:

Արփինե Հովհաննիսյանը նշեց, որ մյուս առաջարկները գրավոր կներկայացնի: