Քննվում է Սերժ Սարգսյանի եղբորորդու՝ Հայկ Սարգսյանի նախնական կալանքի հարցը

Երևան քաղաքի ընդհանուր իրավասության դատարանի Շենգավիթի նստավայրում դատավոր Աննա Դադիբեկյանի նախագահությամբ այսօր քննվում է ՀՀ 3-րդ նախագահ Սերժ Սարգսյանի եղբորորդու՝ Հայկ Սարգսյանի նախնական կալանքի հարցը:

Հայկ Սարգսյանի պաշտպան Երեմ Սարգսյանը դատարանին ներկայացրեց, որ քրեական գործի ուսումնասիրման ժամանակ ներկայացված փաստաթղթերի մեծամասնությունը պատճեններ են։ Նա միջնորդեց, որ դատարանը  վարույթ իրականացնող մարմնից պահանջի ներկայացված փաստաթղթերի բնօրինակները, որպեսզի հասկանա՝ պատճենները հավաստի են, թե՝ ոչ, և դրանից հետո միայն շարունակվի դատաքննությունը։

Մեղադրող կողմը նշեց, որ վարույթ իրականացնող մարմինը բոլոր ապացույցները, որոնք դրվել են Հայկ Սարգսյանի մեղադրանքի հիմքում, ձեռք են բերվել ՀՀ քրեական դատավարության օրենսգրքով սահմանված կարգով։

Դատարանը փաստաթղթերի վերաբերյալ միջնորդությունը կքնարկի հաջորդ դատական նիստի ժամանակ։

«Իրավապահ մարմինները մրցավազքի մեջ են, թե ով ավելի սենսացիոն բացահայտում կանի՝ այլ մարմինների դուր գալու համար։ Հայկ Սարգսյանի գործով փորձել են օրինական և անօրինական կերպով այնպես անել, որ Հայկ Սարգսյանը կալանավորվի, և այնպիսի ծանր մեղադրանք առաջադրեն, որ նա հնարավորինս երկար մնա անազատության մեջ»,-ասաց պաշտպանը։

Պաշտպանը նաև նշեց որ իրենք բազմաթիվ փաստեր ունեն, որոնք կներկայացնեն դատաքննության ժամանակ։

Դատական նիստն ընդմիջվել է 15 րոպեով։

Նշենք, որ այսուհետ նախնական կալանքի հարցերը քննարկվելու են կողմերի մասնակցությամբ:

Հիշեցնենք, որ ըստ մեղադրանքի՝ Հայկ Սարգսյանը 2007թ. ապրիլի 1-ին ժամը 16:00-ի սահմաններում իր բնակության վայրի` Երևան քաղաքի Թումանյան փողոցի 11 շենքի 14 բնակարանի նկուղային հարկում գտնվող սենյակում քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող «SIGSAUER» տեսակի ատրճանակով Դավիթ Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում: