Ինքնահրկիզված քաղաքացու վիճակը մնում է ծայրահեղ ծանր. ոստիկանությունը դեռ ոչինչ չի պարզել

Հանրապետության հրապարակում՝ կառավարության շենքի գլխավոր մուտքի դիմաց, սեպտեմբերի 9-ին ինքնահրկիզման դիմած քաղաքացու վիճակը շարունակում է մնալ ծայրահեղ ծանր:

Ինչպես տեղեկացրին ՀՀ առողջապահության նախարարությունից, 49-ամյա Ա. Պ.-ն ունի մարմնի շուրջ 57 տոկոսի եւ շնչառական ուղիների 20 տոկոսի լուրջ այրվածքներ` 2-րդ, 3-րդ եւ 4-րդ աստիճանի, եւ խորը վերքեր: Միացված է արհեստական շնչառության սարք:  

Ճառագայթային բժշկության և այրվածքների հանրապետական գիտական կենտրոնում բժիշկները պայքարում են քաղաքացու կյանքը փրկելու համար:

ՀՀ ոստիկանության լրատվության բաժնից ԼՈՒՐԵՐ.com-ի հետ զույցում նշեցին, որ նախաքննությունը դեռ շարունակվում է և առայժմ պարզ չէ ինքնահրկիզված քաղաքացու քայլի դրդապատճառը: 

Հիշեցնենք, որ երեկ վարչապետ Փաշինյանն այցելել էր կառավարության դիմաց ինքնահրկիզման փորձ արած քաղաքացուն, որից հետո կատարել էր հետևյալ գրառումը.

«Ճառագայթային բժշկության և այրվածքների գիտական կենտրոնում այցելեցի այսօր կառավարության շենքի դիմաց ինքնահրկիզում իրականացրած քաղաքացուն:

Վիճակը գնահատվում է ծայրահեղ ծանր: Բժիշկները պայքարում են նրա կյանքը փրկելու համար: Ցավում եմ շատ: Ծանր է շատ»: