«Վճարիր 8 օրվա ընթացքում և ստացիր 50% զեղչ». Միհրան Պողոսյանը ակտերի վճարման նոր մեխանիզմ է առաջարկում

Ազգային ժողովն այսօր՝ սեպտեմբերի 10-ին,  քննարկման է դրել նաև պատգամավոր Միհրան Պողոսյանի կողմից ներկայացված՝ «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» օրենքի նախագիծը:

Ըստ Պողոսյանի, տվյալ նախագիծը ներկայացնելու համար հաշվի է առել մի քանի գործոններ, որոնք կապված են վարչական պատասխանատվության ենթարկված անձանց սոցիալական բեռի, վարչական և դատական մարմինների ծանրաբեռնվածության թեթևացման հետ:  Պողոսյանը տվյալ նախագծով առաջարկում է լրացում անել, համաձայն որի՝ վարչական ակտերի վճարման գործընթացում տրամադրել արտոնություն՝ իրավախախտում կատարած անձանց շրջանակում:

«Առաջարկս հետևյալն է՝ իրավախախտում կատարած անձինք վարչական ակտը ստանալուց հետո 8 օրվա ընթացքում վճարելու դեպքում սահմանված գումարի 50%-ն իրավունք ունենան վճարելու: Սակայն սա չի վերաբերում բոլոր վարչական ակտերին. կան որոշակի բացառություններ, օրինակ՝ անսթափ վիճակում տրանսպորտային միջոց վարելը  կամ այնպիսի խախտումներ, որոնք իրենց վտանգավորության աստիճանով լուրջ հետևանքների կհանգեցնեն»,-ասաց Միհրան Պողոսյանը:

Պողոսյանի համոզմամբ, այս նախագծի շնորհիվ կավելանա թե՛ տուգանք վճարողների թիվը, և  թե՛ պետբյուջե մուտք գործող գումարների չափը:

Պողոսյանի ներկայացրած նախագծի հաջորդ փոփոխությունը վերաբերում է վարչական ակտերի վճարման 15-օրյա ժամկետին: Ըստ նրա՝ օրենքը պահանջում է՝ վարչական ակտերի դիմաց վճարումները կատարել ծանուցումն ստանալուց հետո 15 օրվա ընթացքում, ինչն էլ, ըստ Պողոսյանի, ձևական բնույթ է կրում, քանի որ այդ ժամկետի խախտման դեպքում ոչ մի իրավական հետևանք չի առաջանում:

Այդպիսով, Միհրան Պողոսյանն առաջարկում է վարչական ակտի վճարման 15-օրյա ժամկետը փոփոխել և այն դարձնել մինչև վարչական ակտի վճարման անբողոքարկելի դառնալը:

Նշենք, որ Միհրան Պողոսյանը հայտնի է օֆշորային ընկերություններ և շվեյցարական բանկերում հաշիվներ ունենալով:

Հիշեցնենք, որ այսօր՝ սեպտեմբերի10-ին, Ազգային ժողովն սկսեց  իր աշնանային նստաշրջանի աշխատանքները: