Արարատի մարզում դպրոցների տնօրեններից պահանջում են աշխատանքից ազատել թոշակառու ուսուցիչներին

Օրերս համացանցում տեղեկություններ տարածվեցին, որ Արարատի փոխմարզպետ Արտավազդ Նազարեթյանը վեց դպրոցի տնօրենների իր մոտ է կանչել և կարգադրել, որ նոր կադրերով համալրելու համար աշխատանքից ազատեն այն ուսուցիչներին, որոնք հատել են 63-ի շեմը:

Սա մեծ իրարանցում է առաջացրել Արարատի մարզի դպրոցներում: Մասնավորապես, Արարատի մարզի Մրգավետ համայնքի ուսուցչուհի Անահիտ Հակոբյանը տեսանյութ է հրապարակել, որտեղ հայտարարում է, որ իրենց դպրոցի տնօրեն Նվեր Զոհրաբյանը փոխմարզպետի հետ հանդիպումից հետո իրեն ասել է, որ առաջիկայում պետք է ազատման դիմում գրի:

Մրգավետ համայնքի դպրոցի տնօրեն Նվեր Զոհրաբյանը ԼՈՒՐԵՐ.com-ի հետ զրույցում մանրամասնեց. «Այո՛, փոխմարզպետն ինձ ու մի շարք տնօրենների իր մոտ կանչեց և ոմն Լիլիթ Միրզախանյանի հետ միասին, որին ներկայացրեց իբրև աշխատակազմի ղեկավար, մեզ հորդորեցին դպրոցից հանել բոլոր թոշակառու ուսուցիչներին: Ես, իհարկե, չհամաձայնվեցի, քանի որ օրենքը նման բան չի պահանջում, սակայն փոխմարզպետը պնդեց, որ նոր կադրերը ևս պետք է աշխատանք ունենան, իսկ թոշակառուներին աշխատանքից հեռացնել է պետք»:

Դպրոցի տնօրենի խոսքով՝ մարզպետի ու Լիլիթ Զոհրաբյանի պահանջն իր համար անընդունելի է. «Ես դեմ եմ: Թող նախ ուրեմն օրենքում փոփոխություններ անեն, նոր պահանջեն իմ ուսուցիչներին ազատել աշխատանքից, թող օրենքով ամրագրեն, որ 63 տարեկանից հետո իրավունք չունեն դպրոցների հետ պայմանագիր կնքել ուսուցիչները: Իհա՛րկե, ուսուցիչներս դժգոհեցին, ինչը բնական է, հիմա չգիտեմ՝ ինչ անեմ»,-դժգոհում է տնօրեն Նվեր Զոհրաբյանը:

Մենք տևական ժամանակ է՝ փորձում ենք խոսել թե՛ Արարատի մարզպետ Գարիկ Սարգսյանի, թե՛ փոխմարզպետ Արտավազդ Նազարեթյանի հետ, սակայն դա մեզ չի հաջողվում, իսկ մարզպետարանից մեզ փոխանցում են, որ վերջիններս «շատ խիստ զբաղված են»:  

Առաջիկայում կներկայացնենք նաև մարզպետի և փոխմարզպետի դիրքորոշումն ու պատասխանները տվյալ թեմայի շուրջ:

Արմինե Միքայելյան