Գյուղացին կանգնած է անասնակերի խնդրի առջև. ի՞նչ է մտածում կառավարությունը

Այս տարի Հայաստանի Հանրապետության լեռնային շրջաններում գյուղացիները կանգնել են իրենց համար շատ կարևոր մի խնդրի՝ անասնակերի պակասի առջև: Մասնավորապես տուժել են Արագածոտնի մարզի գյուղական համայնքները, որտեղ անասնակերի դեֆիցիտը գյուղացիներին ստիպել է մորթել անասունների մի մասը՝ մյուս մասին կերակրելու համար:

Lurer.com-ը կապ հաստատեց Արագածոտնի մարզի գյուղական համայնքների ղեկավարների և բնակիչների հետ:

Ռյա-Թազայի գյուղապետ Ահմադ Բրոյանը հաստատեց վերոնշյալը: Նա նշեց, որ այն գյուղացիները, ովքեր ունեն բավարար ֆինանսական միջոցներ, անասնակերը ձեռք են բերում Հայաստանի այլ վայրերից՝ խոտի 1 խուրձը 1,600-1,700 դրամով, իսկ ովքեր չունեն այդ միջոցները, ստիպված են անասունների մի մասը մորթել և վաճառել՝ դրա դիմաց ստացված գումարով մնացածին ձմռանը կերով ապահովելու համար: Բրոյանը ասաց նաև, որ մսագործներն ու մսավաճառները օգտվում են ստեղծված իրավիճակից և մորթված անասունների միսը գնում են անհամեմատ ցածր գնով՝ 1 կգ-ը 1,100-1,200 ՀՀ դրամով:

Lurer.com-ի այն հարցին՝ արդյոք Գյուղատնտեսության նախարարությունը կամ Արագածոտնի մարզպետարանը ինչ-որ քայլեր ձեռնարկում են՝ աջակցելու Ռյա-Թազա գյուղին, Ա. Բրոյանը պատասխանեց, որ միայն առաջարկում են 8-10%-ով վարկեր՝ անասնակեր կամ գարի և խտացված կեր գնելու համար, իսկ Ապարանին հարակից անտառում կարողանում են 1հա-ի դիմաց 8,000-10,000 ՀՀ դրամով խոտ ձեռք բերել, չնայած այն հանգամանքին, որ ՀՀ գյուղատնտեսության նախարարությունից Հայանտառին ցուցում է տրվել, թե գյուղացիներն իրավունք ունեն առանց որևէ գումար վճարելու խոտ ձեռք բերել, որպեսզի կարողանան ինչ-որ չափով կոմպենսացնել անասնակերի դեֆիցիտը:

Նույնն է իրավիճակը նաև Ալագյազ, Բերքառատ, Ներքին Բազմաբերդ և հարակից այլ գյուղական համայնքներում: Այստեղի բնակիչները ևս բողոքում են անասնակերի պակասից և ստիպված են երկու եղանակով լուծել դեֆիցիտի խնդիրը՝ կամ իրենց ֆինանսական միջոցներով ձեռք են բերում թանկ գներով խոտի խրձեր, կամ էլ անասունների մի մասը մորթում և վաճառում են՝ մյուսներին կերակրելու համար։ Ստացվում է՝ գյուղացին երկուստեք վնաս է կրում. չի կարողանում անասնակեր ձեռք բերել կամ ստիպված միսը վաճառում է անհամեմատ էժան գներով:

«Նույնիսկ 1,300 դրամով միս առնող չկա՝ թանկ է»,- ասում էր Ալագյազի գյուղապետ Ազիզ Մհոյանը: Բերքառատ գյուղի գյուղապետը Lurer.com-ի հետ զրույցում նշեց, որ այս տարի 80 հա տարածքում ցանված ցորենից կարողացել են ստանալ միայն 10 հա բերք, իսկ 1,600 գլուխ անասուն ունեցող գյուղական համայնքը անասնակերի պակասի պատճառով ստիպված է մորթել 600 գլուխ անասուն: Ներքին Բազմաբերդ գյուղի բնակիչներից տեղեկացանք, որ իրենց մոտ հաճախ չեն էլ կարողանում մորթված անասունի միսն իրացնել. ձեռնտու չէ այն վաճառել շատ ցածր գնով, իսկ տեղում իրացնելը հնարավոր չէ:

ՀՀ գյուղատնտեսության փոխնախարար Սամվել Գալստյանը «Հայկական ժամանակ» օրաթերթի հետ զրույցում նշել էր, որ իրենք տեղյակ են ՀՀ գյուղական համայնքներում անասնակերի պակասի մասին և ՀՀ մարզպետերին հանձնարարել են, որպեսզի գյուղական համայնքների ղեկավարների միջոցով գյուղացիներին տեղյակ պահեն, որ չայրեն հացահատիկի դաշտերը և ծղոտները հավաքեն ու օգտագործեն որպես անասնակեր: Սակայն գյուղական համայնքների հետ զրույցից ակնհայտ է, որ գյուղացիները առանց զգուշացման էլ գիտակցում են այդքանը։

Ստացվում է՝ ՀՀ կառավարությունը լավատեղյակ է անասնակերի պակասուրդի մասին, բայց էական քայլեր չի ձեռնարկում՝ օժանդակելու գյուղացիներին: Նույնիսկ Հայանտառին զգուշացնելուց հետո գյուղաբնակերը գումար են վճարում՝ անտառից խոտ ձեռք բերելու համար:

Եթե անասունների համատարած մորթը այս տեմպերով շարունակվի, ապա 2013թ.-ին Հայաստանում ոչ թե անասնակերի, այլ՝ մսի պակաս կդիտվի, ինչն իր հերթին զգալիորեն կբարձրացնի գները: