Ինչպես «ձուկը» ջրում. Սամվել Ալեքսանյանը «հին գործին» է վերադարձել

ՏՄՊՊՀ նախագահ Գեղամ Գևորգյանն ԱԺ-ի դատին է ներկայացրել իր ղեկավարած կառույցի 2019 թվականի հաշվետվությունը: Առանձին վերցված այդ հաշվետվությունը կարող էր տպավորիչ լինել, եթե չլիներ 2018-ի նույնանման հաշվետվությունը և դրանց պարզ համեմատականի արդյունքում վերհանված խնդիրները: Դիցուք՝ 2018-ին հակամրցակցային համաձայնության 0 դեպք էր գրանցվել, 2019-ին՝ 2: 2018-ին գերիշխող դիրքի չարաշահման 3 դեպք էր արձանագրվել, 2019-ին՝ 20: Համակենտրոնացման հայտարարագրումը 2018-ին կազմել է 25, իսկ 2019-ին՝ 30: 2018-ին՝ չհայտարարագրված համակենտրոնացման 7 դեպք, 2019-ին՝ 8 դեպք: Անբարեխիճ մրցակցության 35 դեպք՝ 2018-ին, 57 դեպք՝ 2019-ին: Պետական մարմինների հակամրցակցային գործողությունների 0 դեպք՝ 2018-ին, 6 դեպք՝ 2019-ին: 

Հանձնաժողովը 2019 թվականին ուսումնասիրություններ է իրականացրել «Բենզին» և «Դիզելային վառելիք», «Սեղմված գազ», «Կարագ», «Շաքարավազ», «Կոնյակ» ապրանքային շուկաներում: 2018 թվականին կարագ իրացրել է 58 ընկերություն, ընդ որում՝ առաջին 3 խոշոր ընկերությունների ընդհանուր մասնաբաժինը կարագի իրացման մեջ կազմել է 79%: Բացի այդ, ուսումնասիրության արդյունքում պարզ է դարձել, որ կարագի մանրածախ և մեծածախ իրացման ոլորտներում որոշ տնտեսվարող սուբյեկտների կողմից վարվող գնային քաղաքականությունը, ինչպես նաև ապրանքային շուկայում ապրանքների շրջանառության ընդհանուր պայմանների վրա ազդեցությունը կարող է պարունակել օրենքի հնարավոր խախտումների հատկանիշներ: 

2018 թվականի ընթացքում ներմուծվել է շուրջ 159 966 տոննա բենզին՝ 6 տնտեսվարող սուբյեկտի կողմից, իսկ 2019 թվականի հունվարի 1-ից մինչև հոկտեմբերի 1-ն ընկած ժամանակահատվածում՝ շուրջ 146 655 տոննա՝ 4 տնտեսվարող սուբյեկտի կողմից։ 2018 թվականին ներմուծման առավել խոշոր ծավալներ են ունեցել «Սիփիէս օիլ քորփորեյշն», «Ֆլեշ» ՍՊԸ-ները և «Մաքս Պետրոլ» ՓԲԸ-ն: Վերջիններիս մասնաբաժինն ընդհանուր ներմուծման ծավալում 2018 թվականին կազմել է շուրջ 92%։ Այսինքն՝ կարելի է փաստել, որ բենզինի շուկայում հեղափոխությունից հետո ոչինչ չի փոխվել: 

Բանանի շուկայի վիճակը նույնպես մխիթարող չէ: Հեղափոխությունից հետո բանանի գնի կտրուկ էժանացումը ներկայացվում էր իբրև հեղափոխության առաջին և գործուն ազդակներից մեկը: Սակայն, շատ չանցած բանանի գները ոչ միայն վերադարձան մինչ հեղափոխական սանդղակներին, այլ մի բան էլ նորանոր ռեկորդներ են սահմանում: Ինքը՝ ՏՄՊՊՀ նախագահը, հայտարարում է, որ «Քեթրին Գրուպը» շարունակում է բանան ներմուծել, բայց այլևս մենաշնորհ չկա: Մենաշնորհ չկա, սակայն կա հսկայական գնաճ, որի դեմը ՏՄՊՊՀ-ն որևէ կերպ չի առնում: Եթե միջնորդ օղակներն են գնաճի պատճառը՝ ինչո՞ւ ՏՄՊՊՀ-ն չի զբաղվում դրանց վերհանմամբ: 

Բացի այդ, ՏՄՊՊՀ ղեկավարը փաստացի ընդունում է, որ Նոր Հայաստանում Սամվել Ալեքսանյանը կարող է դեմպինգի դիմել: Իհարկե, շատ ողջունելի է, որ այդ հանգամանքը համապատասխան քննության առիթ է դարձել, սակայն կարո՞ղ է արդյոք ՏՄՊՊՀ նախագահը պատասխանել այն հարցին, թե որտեղից Սամվել Ալեքսանյանին այնքան «դուխ», որ մենաշնորհը կոտրելու և մրցակցային դաշտ ստեղծելու մասին Փաշինյանի հայտարարությունից հետո դիմի դեմպինգի. փաստորեն, նրան այդ «դուխը» Նոր Հայաստանում, այնուամենայնիվ, տվել են…